Etxez etxeko langileak grebara doaz
Pasaiako Udalak etxez etxeko langileen hitzarmena hobetzeko baliabideak agindu baldin baditu ere, Matia-Goxara enpresari baliabide horiek bere etekinetara bideratu nahi izana leporatzen diote langileek. Zenbat greba egun iragarri dituzte.
“Prekarietate” egoera bizi dute Pasaiako etxez etxeko laguntza zerbitzuko langileek: erabiltzaileak artatzera bakarrik joan behar izaten dira, pisua hartu behar izaten dute inolako laguntzarik gabe… Finean, “lan kargak eta lan erritmoak handitzen doaz”.
Hori gutxi balitz, udalak azpikontratatua duen Matia-Goxara enpresak ez die langileei gutxieneko lanaldirik bermatzen, hortaz, “ez dute gutxieneko soldata baten ziurtasuna hilabete bukaeran”.
LAB eta ELA sindikatuek jakinarazi dutenez, azken hilabeteetan Pasaiako Udalarekin zenbait bilera egin dituzte etxez etxeko langileen lan baldintzak hobetzeko, eta udalak “hitzarmena hobetzeko baliabide ekonomikoak agindu” ditu.
Haatik, Matia-Goxara enpresak udalaren baliabideak enpresaren etekinetara bideratu nahi du, “absentismoa oso altua dela argudiatuz eta honela enpresak nahi adina etekin ateratzen ez duela argudiatuz”. Langileek, ordea, euren lan baldintza “prekarioak” ikusita, argi dute “absentismoa ez dela arrazoirik gabeko arazo bat”.
Horregatik, hainbat greba egun iragarri dituzte bi sindikatuek. “Onartezina da zerbitzu hori emateko azpikontratatua dagoen enpresak, Matia-Goraxak, diru publikoarekin zaintzaren kontura negozioa egin nahi izatea, langileon lan baldintzak prekarietate egoeran iraunaraziz”.
Hitzarmenaren negoziazioa desblokeatzeko eta hitzarmen duinerako aldarrikapenak kontuan hartzeko eskatu diote enpresari. Udalari, ordea, egoeraren konponbidea bideratzeko galdegin diote. Izan ere, etxez etxeko langileek lana “ezinbestekoa” da herritarrentzako. “Gure lan osasuna bermatzea, dagokigun eskubidea da”.
Hori dela eta, bihar (hilak 29), abuztuaren 8an, 14an, 20an, 25ean eta irailaren 1etik aurrera egunero greba egingo dutela iragarri dute. Matia-Goraxaren Donostiako egoitza eta Pasaiako Udalaren aurrean elkarretaratzeak egingo dituzte egun horietan, “Zaintzarekin negoziorik ez!” aldarrikatzeko.
