Matia-Goxara enpresako langileek lehen greba eguna egin dute
Lan baldintzak negoziatu ezean greban jarraituko dutela iragarri dute. Hurrengo greba eguna abuztuaren 8an izango da.
Atzo iragarri bezala, Pasaiako Etxez Etxeko langileek gaur egin dute lan hitzarmenaren negoziazioa desblokeatzeko lehen greba eguna. Goizean zehar zenbait langile elkartu eta Matia gunearen atarian elkarretaratze zaratatsua egin dute. Udaletxean egin den ezohiko udalbatzarrean ere izan dira euren eskeekin, udalak Matia-Goxarari esleitua diolako zerbitzua; konponbidean parte har dezala galdegin diote udalari.
Lan baldintza kaskarrez kexu dira langileak: “Lan kargak eta lan erritmoak handitzen doaz” esan dute, eta hortaz gain, enpresak ez die gutxieneko bermatzen.
Azken hilabeteetan sindikatuek udalarekin zenbait bilera egin dituzte eta horietan lan baldintzak parekatzeko bidean, urratsak emateko borondatea duela adierazi du udalak. Matia-Goxara enpresak aldiz, bere etekinetara bideratu nahi duela ohartarazi dute langileek, “absentismoa oso handia dela eta ondorioz, nahi adina etekin ateratzen ez dituela argudiatuta”. Baina LAB eta ELA sindikatuek jakinarazi dutenez, medikuak langileei baja ematen dietenean, enpresak ez die %100 osagarria ordaintzen.
“Langile horien zerbitzua ezinbestekoa da Pasaiako herritarrentzat. Dagozkien lan baldintza duinak eta hitzarmena eskatzen dute langileek, lan osasuna eskubidea dela oroitaraziz” esan dute sindikatuek.
43 dira udalak azpikontratatua duen Matia-Goxara enpresan lanean dabiltzan langileak, eta lan baldintzak negoziatu ezean greban jarraituko dutela iragarri dute. Abuztuaren 8, 14, 20 eta 25erako greba egunak deitu dituzte, eta irailaren 1etik aurrera hilabete osoan zehar egingo dute greba.
