Sanjuandarrak bikain 20 urte azpiko Espainiako Atletismo Txapelketan
Uxue Sainz de Baranda, Ander Aramendi eta Mikel Aramendi Villafranca de los Barros-en (Badajoz) lehiatu dira asteburuan eta "pozik" itzuli dira etxera.
Uxue Sainz de Baranda, Ander Aramendi eta Mikel Aramendi. Pasai Donibaneko atletak Villafranca de los Barros-en (Badajoz) izan dira asteburuan, bertan antolatu den 20 urte azpiko Espainiako Atletismo txapelketan parte hartzen.
Iñaki Lopetegi entrenatzailearen esanetara aritzen dira Uxue Sainz de Baranda, Ander Aramendi eta Mikel Aramendi. Lehena Donibaneko taldearekin lehiatzen da, Ander eta Mikel anaiak, berriz, BAT taldearekin aritzen dira.
Sainz de Barandak 1.500 metroetako proban parte hartu eta finalerdietara heltzea lortu zuen. Lasterketa txukuna burutu zuen sanjuandarrak. Ordularia 4:55 minutuan gelditu zuen, baina ez zen finalera sartzeko nahikoa izan.
Ander Aramendik, aldiz, 3.000 metroetan parte hartu zuen. Oso lasterketa motela izan zen. Lehen 2000 metroak elkarrekin egin zituzten denek. Lehen erasoari ondo erantzun zuen pasaitarrak eta 800 metroren faltan, bigarren erasoan, hirugarren tokian kokatzea lortu eta hala helmugaratu zen.
Dominaz gain, albiste on batekin itzuli zen etxera: txapelketaren ondoren abuztuan 7tik 10era Finlandian ospatuko den Europako Txapelketan 3000 metroko frogan parte hartzeko hautatuta izan denaren baieztapena jaso zuen.
Azkenik, Mikel Aramendik 3.000 oztopoetan parte hartu zuen. Elkarteak azaldu duenez zorte ona izan zuen Mikelek; izan ere, A taldean lehiatzea egokitu eta aukera ondo aprobetxatu zuen: “13 atletatik berarena zen markarik okerrena (9:20 minutu). Maila handia zegoen eta 7 atletek 9 minututik beherako markak zituzten. Baina guzti hau Mikelek ondo aprobetxatu zuen” esan dute.
1.200 metroren faltan lasterketa buruan jarri zen. Horrek taldea guztiz puskatzea eragin zuen. Mikel bost atletez inguratuta geratu zen eta ahalegindu zen arren, azkenean bosgarren amaitu zuen lasterketa. Hori bai, haren denbora 10 segundo hobetzea lortu zuen (9:10:76 minutu). Lasterketa honen ondoren Espainiako rankingean 9. postuan kokatu da.
