"Israel isolatu behar dugu, pentsaezinak diren arlo nagusi eta detaile txikietan ere"
Oiartzuarrek ere ez zuten hutsik egin atzo. Goizean bezala, arratsaldean ere asko izan ziren Palestinako banderekin eta kazolekin kalera irten zirenak.
Jendetza bildu zen atzo arratsean Done Eztebe plazan. Oiartzuarrek ere ez zuten hutsik egin atzo. Herriko lantegi eta ikasgelak hutsik gelditu ziren goizean, Donostiako mobilizazio erraldoietan izan baitziren oiartzuar asko eta asko. Arratsaldean ere asko izan ziren Palestinari elkartasuna adierazi eta genozidioa eten dezatela exijitzera kalera irten ziren herritarrak. Iluntzean dozenaka eta dozenaka lagun Done Eztebe plazan bildu ziren, Palestinako banderak eta kazolak eskuetan, erakunde zein enpresei Israelekin harreman oro eten dezatela exijitzera, eta azken egunetako bake akordioarekin genozidioa ez dela bukatzen aldarrikatzera. Zaratatsuak izan baitziren atzo arratseko mobilizazioak. Zaratatsuak eta jendetsuak. Eskualde oso bat kalera irten zen atzo.
Burrunbaren ondoren, LABeko ordezkari batek hitza hartu zuen Gernika-Palestinaren irakurketa egiteko. Hitz hauekin moztu zuten burrunba: “Etxera itzultzea etxe arrastorik gabe. Harriak, hautsa, hutsa, tranpak, oroitzapenak, malkoak, inoiz itzuliko ez dena begi bistan. Halaz ere, itxaropentsu. Hondakinak baino, genozidioaren frogak dira. Herri nekaezinaren metafora”.
Nazioarteko komunitateari ardurak exijitu zizkieten atzo bertaratutakoek, amorruz. “Nola liteke XXI. mendean halako inpunitate sadikoa? Nork bermatuko die palestinarrei etxe birrinduetara itzultzeko eta berreraikitzeko eskubidea? Palestinak libre izateko duen eskubidea errespetatzen dela bermatu behar du munduak”.
Israel isolatzeaz ere aritu ziren atzokoan, “pentsaezinak diren arlo nagusi eta detaile txikietan ere”, atzoko deitzaileen arabera. Maila guztietan herrialde genozida honen kontra egiteko beharra nabarmendu eta honako mezua zabaldu zuten: “Palestina entzun behar dugu eta palestinarren hitza errespetatua iza behar da. Guri konpromisoak hartzea dagokigu, bakoitzak Palestina babesteko egin dezakeen hori egiteko momentua delako”.
Hemen klik eginez gero Gernika-Palestinaren irakurketa osoa jaitsi daiteke (PDF artxiboa da).
