Bihartik aurrera, aparkaleku aldaketak Donibanen eta San Pedron
Hilaren 14tik 17ra Pasaia Itsas Festibalaren laugarren ekitaldia jasoko du Pasaiako badiak, eta jaialdiak eragina izango du aparkalekuetan.
Ostegunetik igandera (hilaren 14tik 17ra) Pasaia Itsas Festibalaren laugarren ekitaldia jasoko du Pasaiako badiak, eta jaialdiak eragina izango du Donibaneko eta San Pedroko aparkalekuetan.
San Pedron ezin ezingo da aparkatu elizaren bidegurutzetik Torreko plazaraino biharko (asteartea, hilak 12) 15:00etatik aurrera. Aparkatuta dauden ibilgailu guztiak asteazkeneko (hilak 13) 08:00ak baino lehen kendu beharko dira. Hilaren 18ko eguerdian edo desmuntatze eta garbiketa lanak bukatzen direnean aparkatu ahal izango da berriz eremu horretan.
Aldaketa horiei aurre egiteko, bertakoentzako aparkaleku alternatiboak gaituko ditu Pasaiako Udalak. Herrerako oinezkoentzako pasabidearen azpiko orubea, Rodolfo zena, aparkatzeko egokituko da hilaren 12ko 15:00etatik hilaren 18ko 08:00etara. Pasaiako Portu Agintaritzako aparkalekua ere erabili ahal izango da, Hospitalilloren ezkerraldeko hesia irekiko baita aparkatzeko. Gune hori hilaren 14ko 12:00etatik hilaren 17ko 20:00etara egongo da erabilgarri. Lonjako aparkalekuko solairu bat ere aparkatzeko gaituko da, behar bezala seinaleztatuta. Eremu hori hilaren 15eko 12:00etatik hilaren 17ko 20:00etara erabili ahal izango da.
Donibaneri dagokionez, hilaren 13ko 15:00etatik hilaren 18ko eguerdira arte edo desmuntatze eta garbiketa lanak bukatu arte ezin izango da Bizkaia plaza osoan aparkatu.
San Pedron egin bezala, Donibanen ere bertakoentzako aparkaleku alternatiboak eskainiko dira. Hilaren 13ko 15:00etatik aurrera Nabalaldean mugatutako eremu bat gaituko dute, betiere pabiloietarako sarbidea errespetatuz.
Pasaia Itsas Festibalaren antolatzaileek eta udalak eskerrak eman nahi dizkiete bizilagunei beren ulermenagatik, eta bisitariei garraio publikoan bertaratzeko eskatu diete, bertakoak ez diren ibilgailuentzako sarbidea mugatua egongo baita.
