Aurreskuan, Oarsoaldea nagusi
Gazte Mailako Aurresku Txapelketa Nagusiko D saileko irabazle izan da Ixone Lorenzo Bergara lezoarra, eta bigarren sailkatu da Mairi Maya Castaño errenteriarra.
Ixone Lorenzo Bergara, larunbatean Legazpin dantzan.Gipuzkoako Euskal Dantzarien Biltzarra Larunbatean jokatu zen Legazpin Gazte Mailako Aurresku Txapelketako Nagusiaren finala, D sailekoena zehazki (2011 eta 2012 urteetan jaiotakoena). Han, Oarsoaldeko dantzariak nagusi: Ixone Lorenzo Bergara lezoarra izan zen irabazle, eta Mairi Maya Castaño errenteriarra bigarren. Zortzigarrenez elkarrekin neskek eta mutilek egindako txapelketaren lehen zatia izan zen Legazpikoa, bigarrena igandean (hilaren 24an) izango baita Errenteria-Oreretan: 11:00etatik, Niessen Kulturgunean, A sailekoen (2016 eta 2018 urteen artean jaiotakoak) eta B sailekoen (2013 eta 2015 urteen artean jaiotakoak) txanda izango da. Erein elkarteak antolatzen duen txapelketak 40 urte egingo ditu igandean, 2019tik delarik mistoa.
Lorenzo eta Mayarekin batera, Oarsoaldeko beste bi dantzari izan ziren lehian Legazpin, hala nola Izadi Arbelaitz Oliberi (Errenteria-Orereta) eta Luka Serrano Sanchez (Lezo). Epaile lanak Idoia Besada Salgadok, Jose Luis Vallejo Etxenikek, eta Nagore Indakoetxea Rodadok egin zituzten.
Dantzariena ez zen izan eguneko sari bakarra. Hala, dantzari irabazlearen irakasleak ere saria jaso zuen, beraz, Ihintza Erauskin Lizarazu lezoarrari ere aitortza egin zioten Ixone Lorenzo Bergararekin egindako lanagatik. Jantzirik egokienaren garaikurra Nora Escudero Mujikari eman zioten.
Legazpiko saioko parte hartzaileen argazki orokorra. Irudia: Gipuzkoako Euskal Dantzarien Biltzarra.
