Ezohiko batzordea eratzeko eskatu dute sozialistek
Azaleratutako eraso matxisten inguruan udalaren kudeaketa egokia den aztertzea duela helburu esan du PSE-EEk.
Gaur salatu dute publikoki Oreretako Mugimendu Feministak, Oiartzungo Feministen Asanbladak eta Bertsozale Elkarteak, Xenpelar Bertso Eskolako irakasle batek hainbat neska eta emakume gazteri eraso sexistak egin dizkiela, eta hori gainera, sistematikoa izan dela 2018az geroztik. Errenteriako Udalak gogor salatu ditu gertaerak, eta erasotzaileaz gain, bertso eskolako zuzendaritzako kide batek gutxienez jarrera babestu duela frogatutzat emanda, bertan behera utzi du bertso eskolaren jarduera. Horrekin batera, Kukai Dantza konpainiarekin lotutakoa atera du argitara alderdi sozialistak.
Testuinguru horretan heldu da alderdi sozialistaren prentsa oharra. Fokua aldatu, eta udalak egin duen egoeraren kudeaketa jarri du erdigunean. Hura egokia izan den aztertuko duen ezohiko batzorde baten urgentziazko eraketa galdegin du. Sozialistek aipatutako bi auzietatik bakarra salatu dute publikoki orain arte, erasoa jaso duten neska eta emakume gazteek hala erabaki eta eskatuta; Xenpelar Bertso Eskolarena, hain zuzen ere.
Irmo arbuiatu ditu PSE-EEk Xenpelar Bertso Eskolarekin eta Kukai Dantza konpainiarekin lotuta azalarazi diren jarrera eta eraso matxistak, “larriak dira benetan testigantzak”. Eragindako emakumeei, berriz, elkartasun eta babes osoa adierazi die.
Oso larritzat jo ditu gertaerak eta herritarren konfiantzari bete-betean eragiten diotela jarri du nabarmen, “udalerriko hezkuntza eta kultur eremu esanguratsuan izan direlako. Horrek erakundeen erabateko ardura, gardentasuna eta ekiteko gaitasuna eskatzen dute. Ezberdinak dira bi auziak, baina agerian utzi dute arazo komun bat: irizpide argien gabezia, gardentasun instituzional falta, eta indarrean diren udal protokoloen hutsegite garbia, halako gertakariei aurrea hartu, antzeman eta ekiteko”.
Kukairen bueltan izandakoak 2024ko abendutik ezagutzen zituela udalak, baina hala ere ez zituela gainontzeko udal taldeak informatu salatu dute sozialistek, “ezta herritarrak ere, gertaerak argitara atera diren arte. Ez du erabakirik hartu Kukai Dantza konpainiarekin duen harreman instituzionalaren, diru laguntzaren, edota egoiliar konpainia gisa jarraitzearen gainean”.
Xenpelar Bertso Eskolaren bueltan gertatutakoa “oso larritzat” jo du PSE-EEk, “adingabeei zuzendutako eta diru publikoz finantzatutako udal zerbitzu bat delako. Larria da jakitea 2018tik aurrekariak izatea eta aurtengo maiatzera arte udalak horren berririk ez izatea. Horrek guztiak, protokoloak huts egin duela erakusten du”.
Hori horrela, ezohiko batzorde baten urgentziazko eraketa eskatu du PSE-EEk, “dagoen informazio guztia argitzen laguntzeko”. Halaber, batzorde horren aurrean nahi ditu Berdintasun, Kultura eta Hizkuntza Politiketako arduradunak, mugimendu feminista, Bertsozale Elkartea, Xenpelar Bertso Eskola eta Kukai Dantza.
Emakumeen nahia eta beharrak erdigunean
Xenpelar Bertso Eskolaren bueltan izandako eraso matxisten gaineko salaketa publikoa gaur goizean egin dute hiru eragilek, erasoa jasan duten emakumeek hala erabakita. Haiek erabaki dute publiko egin behar zela gertatutakoa. Kukai Dantza konpainiaren bueltan ez da salaketa publikorik izan, kontrara. Horren arrazoia, bera, erasoa jasan duten emakumeen erabakia, alegia. Irizpide horrek markatzen du eraso matxisten bueltan egiten den lanketaren bidea, eragindako emakumeen nahiak eta beharrak, haien erabakiek.
Hamarkadak daramatza mugimendu feministak emakumeen babesa eta erreparazioa artikulatzen, protokoloen kudeaketan eta emakumeak akonpainatzen; beti jartzen ditu erasoak jasandako emakumeen beharrak eta nahiak erdigunean. Batzuetan isiltasunetik eta diskreziotik egiten dute, beraz, lanketa; beste batzuetan salaketa publikoa eginez. Garrantzitsua litzateke hori aintzat hartu, eta batez ere errespetatzea, emakume horien mesedetara. Aukera eta erabaki guztiak dira-eta zilegi.
