Xenpelar Bertso Eskolaren jarduera etetea ez da nahikoa EAJrentzat
Informazio guztia Fiskaltzari eta agintari eskudunei helarazteko eskatu du talde jeltzaleak.
EAJko zinegotzien artxiboko irudi bat.EAJ Xenpelar Bertso Eskolako irakasle batek modu sistematikoan eraso duela jakinarazi zuen atzo mugimendu feministak, eta Bertsozale Elkarteak. Soka luzea ekarri du horrek, eta salaketa eta gaitzespen adierazpen ugari ari dira heltzen azken orduetan. Errenteriako EAJk ere egin du gertakarien gaitzespena, eta erasoa jaso duten emakumeak erdigunean jartzeko eskatu du, “babes eta gertutasun osoa adierazi nahi diegu erasoak, jazarpena, jokabide matxistak, eta eskubideen urraketak salatu dituzten emakumeei, baita haien senide eta gertukoei ere”.
Horrekin batera “zuhurtzia handienetik” eta “ondorio judizial edo penalik aurretiaz atera gabe” ezinbestekoa jo dute jeltzaleek erakunde publikoek “arduraz, gardentasunez eta behar den arretaz jardutea., bereziki emakumeei eta adingabeei eragiten dieten larritasun handiko gertakarien aurrean”.
Erasoak jaso dituzten emakumeei aipamena berriro jeltzaleek, haien babes integrala bermatzen dela ziurtatzeko, “birbiktimizazio egoerak saihestu, eta laguntza psikologiko, juridiko eta sozial egokiak ziurtatuz”. Harago jo du EAJk eta bertso eskolaren jarduera etetea ez zaiola nahikoa iruditzen adierazi du, “herritarrek berme argiak behar dituzte Errenteriako Udalak hasieratik beharrezko mekanismo instituzional eta administratibo guztiak aktibatu dituela ziurtatzeko, gertatutakoa argitzeko, eta antzeko egoerak berriz gerta ez daitezen “.
Hori horrela, sei eskaera zehatz egin dizkio udalari alderdi jeltzaleak. Eskura duen informazio guztia Fiskaltzari eta agintari eskudunei helaraztea; barne ikerketa bat abiatzea, prebentzio, gainbegiratze eta babes mekanismoetan egon daitezkeen hutsuneak argitzeko; berehala berrikustea eraso matxisten aurkako prebentzio eta jarduera protokoloak, baita adingabeen babeserako neurriak ere, udal jarduera eta espazio guztietan; kanpo auditori bat egitea prozesu osoari gardentasuna eta konfiantza emateko; indarrean den Berdintasun Plana benetan betetzen dela bermatzea; eta, gertakari hauetatik edo egon litezkeen huts instituzionalengatik eratorritako erantzukizun politiko eta administratiboak argitzea, hala badagokio.
Gainera, adingabeei zuzendutako udal jarduera guztiak berrikustea eskatu du EAJk, “babes, prebentzio eta zaintza estandar gorenen arabera betetzen direla bermatzeko”.
