Euskal Herriko Eskolartekoa jokatu dute asteburuan
Kattalin Arabolaza izan zen hamahiru finalistetako bat, eta finaleko bigarren fasera pasa bazen ere, ez zuen txapela janztea lortu.
Euskal Herriko Eskolartekoa jokatu dute asteburuan Arantzan, eta bertan izan da Kattalin Arabolaza Palomo oiartzuar gaztea. Orotara hamahiru bertsolari aritu dira kantuan, eta Unax Aizpurua izan da garaile; txapeldunorde, berriz, Kattalin Lizarraga izan da.
Ekhiñe Zapiain Arlegi eta Eki Mateorena Zozaia gai jartzaileak igo ziren oholtzara lehenbizi, eta atzetik igo ziren bertsolariak, zozketa bidez erabakitako ordenari jarraiki.
Epaile lanetan Amaia Telletxea, Ainhoa Arregi, Aitor Jimenez, Unai Muniain eta Zuhaitz Olazabal aritu ziren, eta idazkari, berriz, Ainhoa Goñi.
Hasierako agurren ondoren lehen atalera egin zuten jauzi, eta lehenbizi zortziko handiko ariketan bina bertso osatu zituzten. Gero, zortziko txikian beste bina bertso egin zituzten. Bada, hamahiru parte hartzaileek abestu zuten lehen atalean, eta sei bertsolari sailkatu ziren bigarren atalera; horien artean zegoen Arabolaza.
Fase horretan banaka aritu ziren, eta lehen puntua emanda bertso bat osatu behar izan zuten zortziko txikian, eta, gero, beste bertso bat gaia emanda, gehienez bost puntuko neurrian.
Ariketak amaituta, epaileek jakinarazi zuten Aizpurua zela aurtengo txapelduna, eta Lizarraga, berriz, txapeldunordea.
Zenbait sari
Finalistek udazkenean egingo den Ahots Bat Sormen egonaldian parte hartzeko aukera izango dute, eta antzerkian, kantugintzan edota literaturan ari diren gazteak ezagutuko dituzte. Gainera Euskal Herriko Bertsolari Txapelketako finalerako sarrera bana ere jaso zuten, eta liburu bana ere eskuratu zuten.
Arabolaza hilaren hasieran elkartu zen HITZArekin, eta hedabideari aurreratu zion “oso polita” dela “horrelako plaza batean abestea”; hots, gehitu zuen “kristoren aukera” dela “Euskal Herriko beste gazte batzuekin plaza partekatzea”.
