3.000 pertsona baino gehiago bildu ditu PDFk
Ekainaren 11tik 14ra Pasaiako Dantza Festibalaren zortzigarren ekitaldia egin zen Antxoko kaleetan. Antolatzaileek baikor baloratu dute aurtengo jaialdia.
Hilabete pasa da Pasaiako Dantza Festibalak (PDF) Antxoko kaleak hartu zituenetik. Jaialdiaren zortzigarren ekitaldia ekainaren 11tik 14ra bitartean egin zen, eta Haatik Dantza Konpainiako kideek baikor baloratu dute aurtengo edizioa. Sustatzaileek programazioaren “kalitate artistikoan” jarri dute arreta, hori baita haien ustez jaialdiaren “indargune nagusietako bat”. Lengoaia, formatu eta belaunaldi ezberdinetako proposamenek osatutako egitarauak publikoaren “harrera bikaina” izan dutela zehaztu dute antolatzaileek.
Kalitate artistikoaz gain, Antxon sortutako giroa goratu dute sustatzaileek, urtetik urtera sendotzen ari dena: “Dantzaren inguruan komunitatea eraikitzen da. Dantzariak eta ez dantzariak, herritarrak eta bisitariak, profesionalak eta amateurrak espazio berean elkartu dira, elkarrekin gozatzeko, hausnartzeko eta esperientziak partekatzeko”.
Horrez gain, jaialdia herriko kultur bizitzan errotzen ari dela baietsi dute: “Dantza kaleko espazioetan modu naturalean bizitzen duen espazio publikoa sortzen eta fidelizatzen ari dela ikusten da, eta horren adierazgarri dira jaialdia urteroko hitzordu gisa bizitzen duten haur eta gazteak; haientzat PDF betidanik egon den eta galdu nahi ez den ospakizun kulturala da”.
Lehen egunetik publikoaren harrera “bikaina” izan zela adierazi dute antolatzaileek, eta jaialdiak 3.000 pertsona baino gehiago bildu zituen Antxon. Bisitariak herritik zein kanpotik etorri ziren barrutira, eta sustatzaileek nabarmendu dute PDF “erreferentziazko hitzordu” bilakatzen ari dela.
Honakoa esan du antolakuntzak jaialdiaren inguruan: “Eskerrik beroenak eman nahi dizkiegu artistei, laguntzaileei, babesleei eta, batez ere, publikoari. Zuen parte hartzerik gabe ezinezkoa litzateke dantzaren inguruan sortzen ari garen komunitate hau eraikitzea. 2027ra begira, ilusio berarekin jarraituko dugu, dantzaren bidez komunitatea sortzen, harremanak ehuntzen eta espazio publikoak kulturaz betetzen”.
