Eutsi festari!
Atzo hasi ziren Donibaneko santioak. Pasaia-Lezo Lizeoko ordezkariak arduratu ziren jaiak pizteko suziria botatzeaz.
Atzo arratsaldean hasi ziren Donibaneko 2026ko Santio Festak. Pasaiako udako azkenak dira, jakina da hori. Baina agian pasaitar gehien bilduko dituenak izango dira. Nola ez, sanjuandarrak jo eta su izango dira bertan hilaren 31ko gauera arte kaleak, txokoak eta plazak euren estiloarekin girotzen. Baina ziur Trintxerpeko, Antxoko eta San Pedroko herrikide askok ere bat egiten dutela santioekin. Beste barruti horietan jada eginak dituzte jaiak, eta zergatik ez, Pasaiako festen aroa barruti arrosan bukatzera joango dira.
Pasaia-Lezo Lizeoko ordezkariak izan ziren 20:00etako festen hasierako txupina botatzeaz arduratu zirenak. Arras eskertuak azaldu diren Jai Batzordeak erabaki duelako haiek izatea lehen orduetako argazkiaren jabe. Izan ere, aurten 50 urte bete dira Pasaiako lau barrutietako ikastolak eta Lezokoak bat egin zutenetik, Pasaia-Lezo Lizeoa sortzeko. Ikastola urtea baliatzen ari da Lizeoa sortu zutenei aitortza egiteko, herrian egindako eta egiten ari den ekarpenari balioa emateko, eta harrotasunez esateko euskararen nahiz euskal curriculumaren aldeko zereginean tinko ari direla. Lurdes Sistiaga, Karmele Sistiaga eta Gema Sistiaga irakasle izandakoak izan ziren ikastolaren ahots atzokoan. Udalaren izenean Teo Alberro alkateak eta Aintzane Taberna alkateordeak hitz egin zuten.
Lizeoko eta udaleko ordezkarien hizketaldiaren ondoren, Lintxuako dantzariek ohorezko Agurra dantzatu zuten, eta segidan suziria bota, eta hasi ziren santioak.
Atzokoaren ondotik dozenaka dira San Juango festetan izango diren ekitaldiak. Horien zati bat behean da. Den-denak ikusteko baliatu esteka haur.
Jarraian, atzoko hasierako ekitaldiko irudiak eta bideoak.
Donibaneko santioak 2026. Datozen egunetako egitaraua.
Gaur (hilak 25, larunbata)
- 10:30: Gaztelutxoko igoera. Kaskoa eramatea derrigorrezkoa izango da. Izen-ematea Meipin egingo da.
- 12:00: Kantu jira arrantzalez jantzita, Meipitik Santiago plazara.
- 17:00: Haurrentzako jolasak eta txokolate-jana Santiago plazan.
- 17:30: Mus txapelketa Bonantzako txosnagunean.
- 18:30: Dantza ikuskizuna Santiago plazan.
- 20:00: Herri kirolak Santiago plazan.
- 22:00: Allur dantza taldearen emanaldia Santiago plazan.
- 23:00: Amador txosnetan.
- 23:30: Enabil Santiago plazan.
Bihar (hilak 26, igandea)
- 09:30: Ezinduak beren etxeetan jaso eta Santa Ama ermitara eramatea.
- 11:00: Meza nagusia Santa Anako ermitan. Ondoren, salda eta pintxo dastaketa, txistulariek girotuta.
- 13:30: Poteoa gramolarekin Patxikutik Santiago plazara.
- 14:30: Kuadrillen bazkari autogestionatua Santiago plazan. Ondoren, bingo musikala, playback lehiaketa eta zumba herrikoia. Bukatzean, poteoa Pasai txarangarekin alde zaharrean.
- 19:00: Poteoa Kidam magoarekin txosna gunetik hasita.
- 21:00: Gauargi erromeria Santiago plazan.
Etzi (hilak 27, astelehena)
- 10:00: Pala txapelketa haur eta gazteentzat frontoian.
- 11:00: Jubilatuen eta arrantzaleen omenezko meza Bonantzako basilikan.
- 14:00: Jubilatuen bazkaria Santiago plazan.
- 15:00: Herriko kuadrillek sardinak eta ikatza jasoko dituzte Arizabalon.
- 16:15: Musika herrian barrena Pasai txarangarekin.
- 19:00: Sardina jana herri osoan.
- 20:00: Javi DJa Santiago plazan.
- 22:30: Arrantzaleen danborrada Konstantzia bandarekin. Ondoren, Javi DJa.
- 00:00: Gorka txosnetan.
