Barraketan ere euskara entzun dadin
Oiartzungo barraketan euskal musika entzun dadin, zerrenda bat osatu dute herriko gazteek.
Zenbait haur Oiartzungo barraketan.Allende Arnaiz Euskara entzuten da Oiartzunen. Euskaraz bizitzeko ahalegina egiten ari dira herritar asko. Alta, hizkuntzaren gaur egungo egoera ez da onena, eta hori irauli nahian dabiltza hainbat esparrutako eragileak.
Hori horrela, Elizaldeko Ttirikittauki eta Haurtzaroko Eskuttun taldeetako gazteek antolatuta, aurten ere Xanisteban Festetako barraketan entzungo den musika aukeratu dute. Gazteen Topalekuko hezitzaileekin elkarlanean eta udaleko Hizkuntz Normalizaziorako sailarekin elkarlanean egin dute jarduera, eta bertan 10 eta 25 urte arteko gazteek hartu dute parte.
Nekane Martiarena Topalekuko arduraduna da, eta hark kontatu du aurten lehenengoz kudeatu dutela jarduera “gazteak topalekuan elkartzen direlako” eta beraz, “aproposa delako bertan egitea”.
Jarduera horretan pertsona bakoitzak hamar abesti proposatzeko aukera izan du; “horietatik zortzi, nahitaez, euskaraz izan behar ziren”, azaldu du Martiarenak. Beste bi kantak, berriz, edozein hizkuntzetakoak izan zitezkeen.
Euskara eremu guztietara zabaltzeko
Topalekuko kudeatzailearen hitzetan, “erantzun ikaragarria” izan du ariketa horrek, orotara 159 pertsonak bozkatu baitute. Are, 1.500 proposamen jaso dituzte, eta 488 abesti ezberdin bildu.
Proposamen horren helburuaren inguruan galdetuta, Martiarenak azaldu du euskal musikari zabalkundea emateko egiten dutela, “euskara eremu ezberdinetan entzun dadin”, alegia.
Ez da lehenengo aldia Oiartzunen egitasmo hau egiten dutena, eta beharrezkotzat eman dute antolatzaileek: “Agian barraketan ez dago horrenbeste aukera musika euskaraz entzuteko, nahiz eta urte asko diren Oiartzunen hau egiten dela”.
Oiartzun arnasgunea bada ere, badago zer eginik: “Guretzat erabat garrantzitsua da euskara alde guztietan entzutea, ez bakarrik barraketan. Euskaraz bizi nahi dugu, euskaraz bizi gara, eta behar-beharrezkoa da euskara zabaltzea toki guztietara. Goza dezagun euskaraz gure herriko xanistebanetan”, esan du Martiarenak.
