Jai berdinzaleen alde, egitarau feminista
Oiartzungo Feministen Asanbladak egitaraua antolatu du xanistebanetarako. Abuztuaren 2an eta 4an izango dira jarduerak.
2025eko xanistebanetako agerraldi feminista.Oier Iriarte Arrondo Jai batzordeak argitaratu du dagoeneko xanistebanetako egitaraua. Dozenaka jarduera izango dira herrian datozen egunetan, eta horien artean badira zenbait feminismoa eta berdintasuna ardatz dutenak.
Oiartzungo Feministen Asanblada 2019an sortu zen, eta orduz geroztik egitarau propio bat sortzen dute festetarako “parte hartzea, komunitatea eta harremanak sustatzea” helburu izanik, betiere erdigunean gozamena dutelarik. Aitziber Erasun asanbladako kideetako bat da, eta kontatu du eurentzat garrantzitsua dela “gozatzeko espazio seguruak” sortzea. Era berean, azaldu du ezinbestekoa dela gorputz eta identitate anitzek lekua izango duten espazio horiek izatea, “bakoitzak bere gorputza askatasunez bizi eta gozatzeko”.
Erasunek adierazi du egitaraua ahalik eta irisgarrien eta erakargarrien egiten saiatu direla “adin guztietako pertsonentzat, pertsona gehiagok parte hartu eta eroso senti daitezen”.
Ohiko egitaraua
Uxue Barrenetxea ere asanbladako kidea da, eta azaldu du Feministen Asanblada sortu zen urtetik hartzen dutela parte jai batzordean; “uste dut horrek laguntzen duela xanistebanak anizkoiagoak izaten”. Hala, nabarmendu du berdinzaleagoak izango diren jaien alde jarraitzen dutela lanean.
Erasunek zein Barrenetxeak, biek azaldu dute garrantzitsua dela asanbladarentzat herrian presentzia izatea, bai publikoki zein modu pribatuan egoerak hala eskatzen duenean. “Jasotzen dugun erantzuna ona da, baina garrantzitsua iruditzen zaigu borrokarako ez ezik, jai girorako zein jai giroan aliantzak sortzea eta elkarren artean artikulatzea, guk ere badugulako ondo pasatzeko eskubidea”.
