Portuko sutean gertatutakoa "argitzeko" eskatu dute Lezo eta Pasaiako alkateek
Sutearen arrazoiak eta ondorioak argitzeko informazioa eskatu diete bi alkateek eskumena duten erakundeei. Biek nabarmendu dute gertakari hori "ezin dela normaltzat jo".
Alberro eta Arruti. Joan den ostiralean (hilak 21) Pasaiako portuan izandako sutearen harira, Lezo eta Pasaiako alkateek ohar bat kaleratu dute. Honetan, besteak beste, sutearen inguruko erantzunak eta neurriak eskatu dituzte. Erakunde eskumenduei “gertatutakoa argitzeko” eskatu diete Mikel Arruti eta Teo Alberrok.
Ostiralekoa argitzeko informazioa bilduko dute bi udalek, baina bi erakundeen ustez lanketa horrek ezin du “sutearen jatorria ezagutzera mugatu”. Suteak eta ondorioak herritarrengan eta ingurumenean izan duen eragina aztertzeko premiaz aritu dira bi alkateak, “baita larrialdia nola kudeatu zen, zer prebentzio neurri zeuden indarrean eta herritarrei informazioa nola eta noiz helarazi zitzaien ere”.
Biek nabarmendu dute gertakari hori “ezin dela normaltzat jo”. Horregatik, eskumena duten administrazio guztiei gertatutakoaren informazio txostenak eskatuko dizkiete: zer geratu zen, zein material zeuden tartean, zein prebentzio neurri zeuden indarrean, nola kuadeatu zen larrialdia eta zein ondorio izan zituen suteak airean, lurzoruan, uretan, eta oro har, ingurumenean.
Oraindik ez dutela inolako informazio teknikarik jaso salatu dute bi alkateek. Dokumentazio eta informazio zehatza eskatuko diete erakundeei. Hain zuzen, sutearen jatorriari eta inguruabarrei, portuan zeuden materialei, prebentzio eta segurtasun neurriei, aplikatutako larrialdi protokoloei, esku hartzearen kronologiari eta portuaren eta udalen arteko komunikazioei buruzko informazioa eskatuko diete Portu Agintaritzari eta txatarrarekin lanean aritzen diren enpresei.
Honi lotuta, SOS Deiaki ere eskaera zehatza egingo diote bi alkateek: larrialdiaren kudeaketari, jasotako abisuei, aktibatutako baliabideei, erakundeen arteko koordinazioari eta herritarrei¡ bidalitako SMS alertaren hedapenari buruzko datuak helaraztea. Jaurlaritzak ES-Alert sistema erabili zuen ostiralean lezoarrei mugikor bidez konfinatzeko gomendioa zabaltzeko, baina halere, bi alkateek aipatu dute “herritarren zati handi batek” ez zuela alertarik jaso. Suhiltzaileen esku hartzeen eta erabilitako baliabideen inguruko informazioa ere eskatuko dute. Azkenik, Jaurlaritzako Osasun eta Ingurumen Sailei sutearen ingurumen eraginari buruzko dokumentazioa eskatuko diote.
2018ko sutea gogorarazi dute Arrutik eta Alberrok, eta honakoa ere argitu nahi dute: “aurreko gertakarietatik zer ikasi den eta ordutik zer neurri gehigarri hartu diren prebentzioaren eta herritarren babesaren alorrean”.
Bi udaletako ingurumen saila dokumentu tekniko bat prestatzen ari da dagoeneko. Ikerketa honekin udalek ez dute soilik gertatutakoa dokumentatu nahi, baizik eta informazio guztia bildu, aztertu eta ondorioak atera prebentzio neurri gehiago lantzeko.
Arruti: “Herritarrak dira suteen kalteak zuzenean pairatu dituztenak, gure eta ingurumenaren ongizatean zuzenean eragiten dute. Horren aurrean, ezinbestekoa da egungo protokoloak eta neurriak ezagutzea, eta betetzen direla bermatzea, are gehiago kaltegarriak izan daitezkeen toxikoak isurtzen dituen suteak urte gutxian bi aldiz jazo direnean”.
Alberro: “Sute hau ezin da gertakari isolatu gisa hartu, eta ez dugu nahi gertatutakoa ahaztea ezta azalpen partzialekin geratzea ere. Herritarrek jakin behar dute zer gertatu zen, nola kudeatu zen larrialdia eta zer neurri hartu diren —edo hartu ez diren— horrelako egoerak berriro gerta ez daitezen. Guk informazio hori guztia eskatuko dugu eta, ondorioen arabera, behar diren neurriak proposatuko ditugu”.
