Iltze bat, beste iltze batek ateratzen (omen) du
600 lagun bildu dira Arrantzaleen eta Tartekoen bazkarian. Santakrutzen egun handiko klasiko bilakatu da belaunaldien arteko festa.
Arotz adituek diote egurrean gaizki iltzatutako iltze bat ateratzeko teknikarik onena, haren kontra beste iltze batekin jotzea dela. Hori omen desmasia konpontzeko modurik egokiena. Bada, lezoar askorentzat latza izan da gaua, parrandazaleen hizkeran iltzea deritzon hori zuten gaur dezentek. Biharamun, bestondo edo aje hori apaltzeko festazale iaioenek diote jaigiroari eustea dela onena, beraz, gaur, gutxi pentsatu behar izan dute Zer egingo dut? galderari erantzun nahi izan diotenek: kalera atera, eta Arrantzaleen nahiz Tartekoen bazkarira joan.
Santakrutzetako egunik handiena da gaurkoa, Santakrutz Eguna, I-14 eguna. Besteak beste, herriko kuadrilla asko biltzen dituen Arrantzaleen eta Tartekoen bazkariaren eguna. Gaztetxoetatik hasita, adinean gora egin baina gazte sentitzen diren horiek bat egin dute I-14 Taldearen gaurko deialdiarekin. Bai, gaurkoarekin; izan ere, atzokoan muntaketa eguna zuten taldekideek, besteren artean Lezo Herri Eskolako jolastoki estaliko eremuan gaurko otordurako mahiak, aulkiak eta bestelakoak ezarri behar zituzten. Baina sei lagun bakarrik azaldu ziren auzolanera atzo. Hortaz, gaur eguerdian udaletxearen parean egin den egunaren txupinazoan, I-14 Taldekoek hitz gozo eta gaziak izan dituzte. Gazietan esan dute auzolanak eta herrigintzak ez lukeela talde txiki baten lana izan behar, herriarena baizik. “Datorren urtean Arrantzale Egunak 25 urte beteko dituela aitzakitzak hartuta, zuen laguntza behar dugu. Ardura asko daude, baina arduradun gutxi, eta hori ez dator bat gure lan egiteko moduarekin”.
Hitz gozoen artean, datu bat eman dute egunaren prestaketan izan direnek. Gaur 24 urte bete dituela zazpi pertsonak hasitako ibilbideak, eta iaz bide horrek goia jo zuela 800 lagun bildu baitziren bazkarian; aurten 600 bat izan dira herri bazkarirako izena eman dutenak. Astelehen buruzuria izateko, zifra oso esanguratsua. Hitz gozoen artean ere esker mezua, arras ederra baita belaunaldi askotako lezoarrak elkarrekin poteatzen ikustea, txitarekin kalejiran dantzan sumatzea, edo elkar egonda bazkaltzea.
Lezo Herri Eskolako itzalean izan da I-14ko bazkaria. Bazkalostean Andoni Ollokiegi sanjuandarraren musikarekin segituko dute festarekin. Herrigunera Jaixkipe txarangarekin aterako dira berriz ere Arrantzaleak eta Tartekoak 18:30ak aldera. 2027an 25 urte beteko ditu santakrutzen ikur bilakatu den belaunaldi arteko festak.
Gaurkoaren ondotik, atseden egunak izango dituzte santakrutzek. Hilaren 17an, osteguna, berraktibatuko da egitaraua. Behealdean, HITZAk jaso dituen hainbat irudi eta bideo.
