Bertso eskolak Herri Arte Eskolak eskainiko ditu urtarriletik aurrera
Udalbatzan erabaki behar dute oraindik proposamena, baina behin onartuta, eskolak Herri Arte Eskolaren egoitzan izango dira. Urtarrilean hasiko da ikasturtea, eta irakasleak langile publikoak izango dira.
Bertso eskolak Herri Arte Eskolak emango ditu aurrerantzean. Bertso eskolak jasotzeko aukera egongo da, baina ez orain arte bezala. Errenteriako Udalak jakinarazi du Herri Arte Eskolaren barruan txertatuko dela bertsolaritza eta bertan izango direla klaseak. Datorren udalbatzan bozkatuko dute proposamena, baina behin hori onartuta, eskolak urtarrilean hasiko dira. Herri Arte Eskolan egindako prentsaurrekoan azaldu dute erabakia Aizpea Otaegi alkateak, Iñaki Queralt Herri Arte Eskolako lehendakariak eta Leire Mazizior Udal Hizkuntza Politika zinegotziak.
Igaro den ikasturtera arte Xenpelar Bertso Eskola Kultur Elkarteak ematen zituen bertso eskolak herrian. Ordea, aurten ohi baino lehenago amaitu zituzten eskolak. Bertan behera geratu ziren maiatzean, Oreretako eta Oiartzungo mugimendu feministek eta Bertsozale Elkarteak salatu ostean irakasle batek bere posizioa eta erreferentzialtasuna erabili zituela erasoak egiteko. “Dakizuen moduan, pasa den ikasturte amaieran nahiko modu ezustekoan eta urgentziazkoan bertan behera utzi genituen ordura arte [Xenpelar] Bertso Eskola Kultur Elkartearen bidez ematen ziren bertsolaritza eskolak”, gogorarazi du Aizpea Otaegi alkateak. Nabarmendu du “konpromisoa” zutela eskolei jarraipena emateko, eta horregatik erabaki dutela aurrerantzean Herri Arte Eskolaren barruan egitea.
Bertso eskolen zerbitzua emateko modua aldatzearen erabaki proposamena datorren asteko iraileko udalbatzara eramango dute, eta behin erabakia onartuta abiatuko dute prozedura antolaketa berriari begira. Ildo horretatik, kazetarien galderei erantzunez, zehaztu dute eskolak langile publiko batek emango dituela. Tasak ere aldatu egingo dira, eta horrek egokitzapenerako denbora beharko duela aurreratu du alkateak. Gauzak horrela, azaroan ate-irekietako jardunaldiak egingo dituzte eta eskolak urtarrilean hasiko dira, aurtengo ikasturtearen prezioa egoerara egokitutakoa izanik.
Bertsolaritza Herri Arte Eskolan txertatzea “urrats naturaltzat” du udalak, jada badagoelako diziplina bat hitzari lotutakoa, eta bertsolaritzak lotura zuzena duelako horrekin. Laburrean, Herri Arte Eskolarentzat zein bertso eskolentzat aldaketa onuragarria dela azpimarratu dute; “kalitatezko urratsa” izango dela.
“Ulertzen dugu familien eta ikasleen urteko antolaketan aztoramendua eragin dezakeela, ikasturtea hasieratik nahi bezala antolatu ezin ahal izatea dakarrelako”, esan du Otaegik. Dena den, zerbitzu aldaketa onuragarria izango delako esperantza agertu dute: “Espero dugu ere herritarrek, familiek eta ikasleek bertsogintzarekiko konfiantza berreskuratzea”.
