Gaurko mezua, argia: "Inpunitatea bukatu zaizue!"
Nazka eta amorrua gainezka atera dira kalera Oreretako Mugimendu Feministak, Oiartzungo Feministen Asanbladak eta Bertsozale Elkarteak deituta dozenaka eta dozenaka lagun Xenpelar bertso Eskolako irakasle batek egindako sexu eraso, jazarpen eta eraso matxistak salatzera.
Dozenaka eta dozenaka lagunek salatu dute Xenpelar bertso Eskolako irakasle batek egindako eraso matxistak. Plazara eraman dute gaur, eremu pribatuan Xenpelar Bertso Eskolaren bueltan modu sistematikoan gertatu diren hainbat sexu eraso eta jazarpen psikologiko, herrietako txoko guztietan agerian uzteko. Nazka eta amorrua gainezka atera dira kalera Oreretako Mugimendu Feministak, Oiartzungo Feministen Asanbladak eta Bertsozale Elkarteak deituta dozenaka eta dozenaka lagun Xenpelar bertso Eskolako irakasle batek egindako sexu eraso, jazarpen eta eraso matxistak salatzera.
Bertso irakasle horrek bere botere posizioa eta erreferentzialtasuna baliatu dituela modu sistematikoan botere harremanak garatzeko, manipulatzeko eta erasotzeko salatu dute: “Denekin patroi bera erabili du: neska gazteak taldetik isolatu, berezi sentiarazi, bertsolaritza munduan aurrera egiteko bere beharra dutela sinestarazi, jazarri eta eraso egin ditu”. Larria oso egoera, urteetan errepikatu dena behin eta berriz, bertso eskoletan, bertso eskolarekin lotutako espazio informaletan eta bertso mundutik haragokoetan, gaur azaldu dutenez.
Gogora ekarri dute gainera, soka luzea duela bertso irakaslearen auziak. Izan ere, indarkeria matxistagatik salaketa jarri zioten Bertsozale elkartean, 2018an izan zen hori. Horren harira neurri batzuk adostu zirela ekarri dute gogora, herenegungo agerraldian azaldutako moduan, eta horiekin bertsolaritzaren esparru formal eta informaletik desagertzea zela helburua: “Urteetan neurriak bete ez, eta berriro komunikatu zitzaion bertso mundutik aldentzeko, eta orduko hartan, erasoak onartu eta bertso mundutik desagertzeko konpromisoa idatziz hartu zuen”. Horren berme gisa, Xenpelar bertso Eskolako arduradunak jarri zituztela esan dute, “erasotzaileak hartutako konpromiso horiek betetzeko jarraipena egiteko ardura hartuko zutela hitz emanez”.
Bertsozale Elkartearekin egindako lanketan hartutako konpromisoak betetzetik urrun, orain jakin da neska gazteekiko jazarpena eta manipulazioa behin eta berriz errepikatu duela, hala zabaldu dute gaurko elkarretaratzearen deitzaileek. Konklusioa, argia: “horrela jokatzea ahalbidetu duen inguru bat egon dela ulertzen dugu. Neurri zehatz batzuk bete behar zituela jakin arren, egoerak bere horretan jarrai dezan utzi duen ingurua”. Erasotzailearekin batera, erasoak betikotzen dituen aliantza patriarkala seinalatu dute, ezinbestekoak izan direlakoan. Argi utzi dute jakin badakitela ez dela inondik ere bertso eskola osoa izan konplize, “ezta erabili diren espazio guztiak ere, urte hauetan guztietan informazio eza nagusi izan baita”.
Erasotzaileak eta haren konplize izan direnek, ordea, euren jarrera salatzeko adorea izan duten neska gazteak aurkitu dituzte aurrez aurre, eta hori balioan jarri du mugimendu feministak: “Azken egunetan, aski da! garrasi egiten etorri zaizkigu neska gazteak. ‘Ardi larruz jantzitako erasotzailea salatzera gatoz’. Emandako aukerak mespretxatu ditu, behin eta berriz erasoak eginez zikin jokatu du. Bere ekintzek markatu dute urte hauetan guztietan bere ibilbide nazkagarria”. Mezu argia erasotzaileari, bere babesleei, “Ezin dugu onartu gure herrian manipulazioa erabiliz eta inpunitate osoz, gure herriko neska gazteak jazartzea eta eraso egitea”.
Alderdi politikoen eta komunikabideen jarrera itsustu dute
Agerian gelditu da beste behin ere zein garrantzitsua den emakumeen arteko saretzea, aliantza feministak sortzea, espazio seguruak eskaintzeko; eta zein ezinbesteko, autodefentsa feminista. Saretzeko gaitasun hori “gutxietsi” duela erasotzaileak eta haren babesleek jarri dute nabarmen: “Urte luzeetan egoon den aliantza patriarkalekin eta inpunitatearekin bukatu nahi dugu. Zuen konplizitatea, isiltasuna, beste aldera begiratzea eta erasoak gutxiestea salatu nahi dugu”. Horretarako, aliantza transfeminista eta saretzea erabiliko dutenaren konpromisoa, “autodefentsa feminista lelo bat baino gehiago da; kalea gurea da eta gaurkoan, jasandako ezkutuko biolentzia guztiak salatzen ditugu”.
Alderdi politiko eta komunikabide hainbaten jarrera itsustu dute, bestalde, gaurko protesta erraldoian. Erasoaren “erabilera interesatua” egitea egotzi diete lehenengoei, “emakumeak babesten dituzuela esaten duzue, baina minduta eta alboratuta dauden biktimen beharrak eta nahiak kontuan hartu gabe, horrelako gertakariak etekin politikoa ateratzeko baliatzen dituzue”.
Bigarrenei, hainbat komunikabideei, alegia, gaiaren gaineko erabilera interesatua egitea egotzi diete, “berriz ere biktimak babestu ordez, ikuskizuna, sentsazionalismoa eta errenta komertziala bilatu duzue, nesken minaren gainetik”.
Azken aipamena, salaketa egin duten neska gazteei, “zuen ausardia eskertu nahi dugu. Zuei esker, erasotzaile bat agerian utzi eta inpunitate kate bat eten da”. Txalo zaparradarekin bukatu dute elkarretaratzea, ohartarazpen batekin, “inpunitatea bukatu zaizu. Inpunitatea, bukatu zaizue”.
