

Justizia, zoriona eta patua bezalako gaiak landuko dituzte igande honetan, hilak 23, emango duten antzezlanean: Distancia siete minutos.

Claudia Behobide hondarribiarrak bigarren postuan bukatu zuen atzo Donostiarrak Kirol Klubak antolatutako 10 kilometroko Udaberri Lasterketa eta Sandra Piera irundarra laugarren izan zen. Mutiletan, Xabier Lukin errenteriarra izan zen Oarso Bidasoko lehen lasterkaria, bosgarren.

Egian Koskorrio tabernaren aurka 34-32 galdu eta gero La Bacaladera Hondarribia eskubaloi taldeak Euskal Ligako bigarren postua galdu du. Azken bi partidak galdu dituzte hondarribiarrek eta hirugarren Amenabarrek lau puntu pilatu ditu, berdeei aurrea hartuz. Lehen bi sailkatuek jokatuko dute Espainiako Lehen Mailarako igoera fasea.

Ara Malikian biolinista libanoarrak Con los ojos cerrados ikuskizuna taularatuko du ostegunean Itsas Etxean, Fernando Egozcue Quinteto taldearekin. Egozcue gitarristak berak idatzitako musika interpretatuko dute, jatorri argentinarrekoa, emotiboa eta intentsoa. 20:00etan hasiko da emanaldia eta sarrerak 10 euro balio ditu.

Asteburu txarra izan da herriko nagusien mailetako kirol taldeentzat. Futbolean hiru taldeek galdu zuten, Ohorezko Mailakoak eta neskek etxean, Ostadarrekin eta Antigua Luberrirekin, eta Lehen Erregionalekoak Getarian. Eskubaloian, La Bacaladera ere esku hutsik itzuli zen Egiatik eta bigarren postua galdu du.


Gaur, osteguna, da azken eguna bihar eta etzi Zuloaga Etxean egingo den bizikletentzako mekanika tailerrean izena emateko. Izena eman nahi duenak posta elektronikoz egin behar du.

Beñat Elzo zenaren omeneko herri krosa antolatzen hasiko dira. Azaroaren 1ean, larunbatez, egingo dute eta sei eta hamar kilometro arteko ibilbidea izango da, Higerreko Farolaren inguruan. Facebook orria ireki dute eta bertan joango dira informazio gehigarriak sartzen. Iazko azaroaren 1ean hil zen Elzo, bihotzekoak jota, Talaia bidean entrenatzen ari zela.