TEDx Pasaia Womenek ideak trukatzeko toki izan nahi du
Abenduaren 1ean TEDx Pasaia Women ekitaldia antolatu dute, eta bertan “merezi duten ideiak” partekatuko dituzte hainbat emakumek. Izan ere, hori da TED (Teknologia, Entretenimendua eta Diseinuaren siglak) ekitaldien filosofia, ideiak partekatzearena alegia. Izaskun Barbierrek bere ekimenez antolatu du San Pedroko ekitaldia, Mujer: sueña y actúa! (Emakume: amets egin eta ekin!) lelopean. Goiz osoan zehar hainbat hizlarik hartuko dute parte (ikus egitaraua taulan). Gizartearen hainbat arloetan aritzen diren emakumeak izango dira Ondartxon 08:30etik aurrera hitz egingo dutenak. TED ekitaldiak AEBtan sortu ziren. X hizkiak, berriz, lokaltasuna adierazi nahi du, herriaren edo hiriaren izenak jarraituta. Abenduaren 1ean egingo dutenak izaera hori dauka, foro lokal bat izatearena. San Pedroko zita ez dago kasualitatez jarrita. Izan ere, Washingtonen egun horretan TEDxWomen ekitaldi nagusia egingo dute (bezperan hasiko bada ere), eta munduko 105 hiri gehiagotan ere egingo da (Espainiako estatuan Valentzian eta Bartzelonan bakarrik). Washingtonen bezperan egingo duten saioetako bat ikus ahal izango dute bertaratzen direnek, gosaltzen ari diren bitartean. Ondoren hasiko dira ponentziak, 10:00etan. Bertan emango dituzten hitzaldi guztiek ezaugarri komun bat daukate: hemezortzi minutu baino gehiago ez dute iraungo. “Hizlari bakoitzak izan duten ideia, esperientzia edo sentimendu bat kontatuko du”, esan du Barbierrek, “bere ametsa bete duen ala ez axola gabe”. Hitzaldi horien [...]
Abenduaren 1ean TEDx Pasaia Women ekitaldia antolatu dute, eta bertan “merezi duten ideiak” partekatuko dituzte hainbat emakumek. Izan ere, hori da TED (Teknologia, Entretenimendua eta Diseinuaren siglak) ekitaldien filosofia, ideiak partekatzearena alegia.
Izaskun Barbierrek bere ekimenez antolatu du San Pedroko ekitaldia, Mujer: sueña y actúa! (Emakume: amets egin eta ekin!) lelopean. Goiz osoan zehar hainbat hizlarik hartuko dute parte (ikus egitaraua taulan). Gizartearen hainbat arloetan aritzen diren emakumeak izango dira Ondartxon 08:30etik aurrera hitz egingo dutenak.
TED ekitaldiak AEBtan sortu ziren. X hizkiak, berriz, lokaltasuna adierazi nahi du, herriaren edo hiriaren izenak jarraituta. Abenduaren 1ean egingo dutenak izaera hori dauka, foro lokal bat izatearena.
San Pedroko zita ez dago kasualitatez jarrita. Izan ere, Washingtonen egun horretan TEDxWomen ekitaldi nagusia egingo dute (bezperan hasiko bada ere), eta munduko 105 hiri gehiagotan ere egingo da (Espainiako estatuan Valentzian eta Bartzelonan bakarrik). Washingtonen bezperan egingo duten saioetako bat ikus ahal izango dute bertaratzen direnek, gosaltzen ari diren bitartean. Ondoren hasiko dira ponentziak, 10:00etan.
Bertan emango dituzten hitzaldi guztiek ezaugarri komun bat daukate: hemezortzi minutu baino gehiago ez dute iraungo. “Hizlari bakoitzak izan duten ideia, esperientzia edo sentimendu bat kontatuko du”, esan du Barbierrek, “bere ametsa bete duen ala ez axola gabe”. Hitzaldi horien helburua gainontzeko parte hartzaileei “mundua aldatu dezaketeela” erakusten laguntzea da.
Emango dituzten hitzaldiak bideoz grabatuko dituzte, eta ondoren Internetera igo. Barbierrek adierazi duenez, www.eitb.com-en streaming bidez emitituko dute Pasaiako TEDx ekitaldia.
Hizlariak, emakumeak
Antolatzaileak adierazi duenez, TEDx-ak emakume eta gizonei irekita daude, “baina Pasaian bereizten jakin izan dugu, eta hizlariak emakumeak bakarrik izango dira, zailtasunak gainditzeko aukera izan duten emakumeak”. Hitza hartuko dutenak udalerrikoak bertakoak zein ingurukoak izango dira.
Hala ere, gonbidatu dituzten hizlariez gain, norbanakoek ponentzia bat aurkezteko aukera izango dute. Hori bai, bost minutukoak izango dira horiek. Izena emateko, ekitaldiaren webgunean sartuta, harremanetan jarri behar da antolatzailearekin (http://tedxpasaiawomen.com). Hiru hautatuko dituzte, ponentzia gehiago aurkezten badira.
Webgune horretan bertan eman behar da izena. Ehun lagunentzako tokia egongo da, eta dohainik izango da. Hitzaldiak bukatu ondoren, bazkaria egingo dute (hori ordaindu beharrekoa izango da). Haurtzaindegi zerbitzua ere eskainiko dute antolatzaileek, eta izena emateko galdetegian ezarri behar da erabiliko den ala ez.
Egitaraua
- 08:30-10:00. Gosaria eta TEDx Womenen lehen saioaren streaming bidezko proiekzioa.
- 10:05-10:10. TEDx Pasaia Womenen aurkezpena.
- 10:10-10:28. Rosa Garcia Orellan idazleak emakume pasaitarrek XX. mendean espazio publiko eta publikoan jokatutako papera azalduko du.
- 10:30-10:45. Nere Ariztoy. Errioxan Urte Sabatikoa lehiaketaren irabazlea. Ya no hay vuelta atrás: la lucha por un sueño hitzaldia emango du.
- 10:47-11:07. Nati Rufo, Lilaton taldekoa. Lasterketaren jaiotzari eta garapenari buruz ariko da.
- 11:09-11:24. Eva Salaberria. Donostia 2016 Bulegoko zuzendari-kudeatzailea da.
- 11:26-11:40. Babro Bellido: Al sol siéntate y abdica para ser reina de ti misma.
- 11:42-12:00. Ane Miren Miralles: Ametsen kutxa. Pasaia-Lezo Lizeoko irakasle eta psikologoa da, baita Albaolako kide ere. Hainbat espediziotan parte hartu du.
- 12:00-12:20. Atsedena kafea hartzeko.
- 12:20-12:30. Ana Sanchez, Herbehereetan bizi den pianojole pasaitarra.
- 12:32-12:48. Marivi Roteta, Pasaiako Udalean 28 urtez zinegotzi izandakoa, eta Eusko Jaurlaritzaren Gizarte Sailen zuzendari izan zen lehen emakumea.
- 12:50-13:08. Itziar Irazusta. 2011n Langile Kudeaketan sariduna. Taldeak Sortzeko Saria ere lortu zuen.
Dora Salazar eskulturgileak ere parte hartuko duela jakinarazi dute.
