Taldean bi sokatiralari oiartzuar dituen Beti Gazte, Euskal Herriko txapeldun
Udane Arbelaitz eta Udane Loidi oiartzuarrak Lesakako taldeko partaide dira. 540 kiloko kategorian nagusitu dira, Idiazabalen.
Udane Arbelaitz (betaurrekoduna), larunbatean [Arg.: Tere Madinabeitia / Goierriko Hitza]. Euskal Herriko zortzinakako sokatira txapelketaren azkeneko jardunaldiak jokatu zituzten larunbat arratsaldean, Idiazabalgo Igarondo pilotalekuko kantxan. Beti Gazte Lesakako taldeko neska zein mutilak ziren faboritoak, eta ez zuten hutsik egin.
Nesken 540 kiloko kategorian Badaiotz izan zen Idiazabalen nagusi. Hala ere, aurreko jardunaldietan egindako lanari esker, Lesakako taldeak jantzi du maila horretako Euskal Herriko txapela. Haiekin batera Txantrea, Gaztedi eta Ibarra taldeak aritu dira lehian.
Beti Gazteko sokatiralari taldeko partaide dira Udane Arbelaitz eta Udane Loidi oiartzuarrak, eta beren ekarpena egin dute talde berdea Euskal Herriko onena izan dadin.
Mutilen 640 kiloko kategorietan lesakarrak izan dira nagusi. Klubak asteburu biribila izan du, hortaz.
