Oiarperen garaikurren apalak hiru txapela gehiago ditu
Euskal Herriko kluben txapelketa lortu du nagusien eta 22 urtez azpikoen mailetan, bikoteka. Gazte Mailako trinket txapelketan, Oiarpeko beste bikote bat garaile.
Oiarpe Kirol Elkarteak bere palmaresa loditzen jarraitzen du. Pasa den asteburuan hiru txapelketa lortu dituzte pilota klubeko pilotariek.
Laudioko Areta auzoan jokatu zituzten kluben arteko Euskal Herriko Txapelketako finalak, eta Oiartzungoak nagusitu ziren senior mailan zein 22 urtez azpiko kategorian.
Maila nagusian, zazpi puntuko aldeagatik nagusitu ziren Andoni eta Iñigo Ugalde. Adiskide klubeko bikotearen kontra jokatu zuten. Koxka bat beherago, Imanol Ugalde eta Ekain Etxeberria Lazkao Antzar Pilota eta Kirol Elkarteko bikotearen kontra neurtu zituzten indarrak. Paretsu aritu ziren, bi puntugatik irabazi baitzuten. Edozein kasutan, txapela Oiartzunera.
Eta hirugarren finala trinket txapelketakoa izan zen. Eneko Zalakain eta Mikel Aranburu ongi baino hobeto egin zituzten eginbeharrekoak Irurako trinketean.
Hala ere, emaitza guztiak ez dira eztiak izan: Zubeldia eta Zalakainek ezin izan zuten Pilotaren Txokoak antolatzen duen txapelketa —20 urtez azpiko kategorian— poltsikoratu.
Asteburuko emaitza guztiak ikusteko, egin klik esteka honetan.