Urkabe Baitan zuzkidurazko eta alokairu sozialeko etxebitzak eraikiko dituzte
Udalak eta Jaurlaritzak hitzarmena sinatu dute etxebizitzak egiteko. Gazteentzako eta behar bereziak dituztenei zuzenduak izango dira.
Urkabe Baita jauregiaren artxiboko irudia. Oiartzungo Udalak zuzkidurazko 20-25 etxebizitza eta alokairu sozialeko hamabost etxebizitza eraikiko ditu Urkabe Baita etxearen eremuan. Horretarako, udalak Eusko Jaurlaritzarekin sinatu du hitzarmena.
Pasa den asteko plenoan onartu zuten etxebizitzen proiektua; erakunde bakoitzak egingo duen ekarpena zehaztu dute.
Eraikiko dituzten etxebizitza horiek gazteentzako zein behar bereziak dituzten gazteentzako izango dira, eta aldi baterakoak.
“Beharrak asebetetzeko”
Etxebizitzaren alorrean Oiartzuni falta zaion pieza izango da. “Eremu horretan Planeamendu Orokorrak uzten zizkigun aukerak ikusita, herriko beharrak asebetetzeko moduko egitasmoa” dela uste du Jexux Leonet alkateak.
Eremuan sartu-irtenak egiteko eremu zaila dela aitortu du udalak, baina hori egokituko dutela. Horrela, Mosa aldetik egingo dute sarrera, jakinarazi dutenez.
Eremua berriro partzelatu
Egitasmoa Urkabe Baita jauregian eta inguruko udal jabetzako eremuan garatuko da. Udalak eremua birpartzelatuko du, Eusko Jaurlaritzari zesioan uzteko.
Aurreko agintaldian (2015-2019) hasi ziren egitasmoa lantzen. Gustura daudela azaldu du Leonetek: “Oiartzunek, bai alde sozialetik zein hirigintzaren ikuspegitik, behar duen zerbait da”.
Egitasmoa ez da etxebizitzak egitera mugatuko. Elizalde auzoa “lotu” nahi dute, eta Urkabe mendirako sarrera segurua sortu.
“Proiektuak bi elementu garrantzitsu ditu: batetik, alokairua beharra dutenen gazte eta herritarrentzako aukera eta, bestetik, Elizalderekin lotura. Legarrea aldea eta herria, bi eremuak lotuko ditu”, gaineratu du Leonetek.
