Sahararrentzako laguntza eskatu dute, COVID19ri aurre egiteko
Euskal Herriko Sahararen aldeko Elkarteek laguntza eskatu dute, COVID-19aren pandemiak mugak itxiarazi eta baliabideak murriztu dituelako.
Euskal Herriko Sahararen aldeko Elkarteek laguntza eskatu dute Afrikako iparraldeko herri horrentzako. Elkarte horretako kide da Oiartzungo El Watan. Saharako Ilargierdi Gorriak jakinarazi dienez, Saharako agintariek prebentzio neurriak garaiz hartu zituzten, COVID-19ri aurre egiteko.
Neurri horiek zerrendatu dituzte: gertuko herrialdeekin mugak itxi zituzten; Wilayen arteko, eta hauen eta Saharar Errepublikako lurralde liberatuen arteko mugimenduak geldiarazi ziren; haimetan geratzeko agindua eman zuten; bilerak eta pertsonen arteko bilkurak debekatu ziren; eskolak itxi egin zituzten; eta ahalik eta langile kopurua murriztu zuten, ahal bezain beste.
Neurriak arrakastatsuak izan direla nabarmendu dute, orain arte ez baita inor kutsatu. Horrela eutsi nahi diote, baina mugen itxierak eragina izan du kanpo laguntza jasotzeko garaian. Merkataritza eta ekonomia jarduerak ere bai behera egin duela jakinarazi dute.
Horrez gain, osasun datuak ere txarrak dira: “Azpimarratu behar da, haurdun dauden eta bular-emaile diren emakumeen artean, anemia- tasa % 73 baino altuagoa dela, 5 urtetik beherako umeen desnutrizioa % 25era iritsi dela eta diabetesa eta tentsio-arazoak dauzkaten pertsona helduen kopurua ere gora egin duela.”.
Kalkuluen arabera, koronabirusa prebenitzeko bost milioi behar dituzte sahararrek. Kopuru horren %18 urarentzat izango da, %37 osasun beharretarako eta %45 elikadurarako.
Horregatik, elkarteak dei egin die herritarrei laguntza ekonomikoa eman dezaten, maiatza eta ekainean. Kontu korronte bat ireki dute: ES7530350080940800048015. Kontzeptuan pandemia idatzi behar da.
