Herritarren energia kontsumoa neurtzeko galdetegia prestatu dute
Herritarren kontsumoa jakin nahi du Oarsoaldea Garapen Agentziak, energia aurrezten eta eraginkorragoak izaten laguntze aldera.
Oarsoaldea Garapen Agentziak galdetegi bat prestatu du, eskualdeko herritarrek eta merkatariek duten energia kontsumoa ezagutzeko. Informazio horrekin, Oarsoaldeko lau udalek beren plangintzak diseinatu ditzakete, energiaren arloan eraginkorrago izan eta aurrezteko.
Garapen agentziak azaldu duenez, COVID19aren ondorengo egoerara moldatzeko asmoz, energia ikuspegi sozialarekin landu behar da, “pertsonak erdigunean kokatuz”.
“Biztanleen energia-errealitatea ezagutu eta beharra duten pertsonei lagundu ahal izateko, ezinbestekoa da udalerri bakoitzeko biztanle eta merkatarien parte hartzea”, gaineratu dute.
Oarsoaldeak bi galdetegi prestatu ditu. Bat, herritarrei zuzendutakoa. Bestea, merkatarientzako. Azkar-azkar egiteko moduko galdetegiak dira, beharrak ezagutu eta neurri zehatzak hartzeko. Zalantzaren bat duenak 943 49 41 29 telefono zenbakira dei dezake, edo e-posta bidez idatzi.