Izan Bidea dinamikak badiako tontorretara eramango ditu lezoarrak eta pasaitarrak
Izan Bidea dinamikak badiako tontorretara eramango ditu lezoarrak eta pasaitarrak igandean. Preso eta iheslarien aldeko martxak egingo dituzte.
Izan Bidea dinamikaren barruan, Sarek badiaren inguruko tontorretara bidean kilometroak egitera eramango ditu lezoarrak eta pasaitarrak hilaren 26an (igandea). Lezotik, Donibanetik, Trintxerpetik eta Antxotik martxa bana aterako da presoen eta iheslarien alde kilometroak egiteko. Lezoko Xoxolur Mendi Klubak, Trintxerpeko Trintxer Mendi Taldeak, Pasaiako Mendizaleak taldeak eta Donibaneko Itsas Mendik bat egin dute iniziatibarekin.
Euskal preso eta iheslarien egoerari irtenbidea emateko urratsak eman eta kilometroak egitea da Izan Bidearen mamia, “herri honen elkarbizitzaren eta bakearen aldeko ibiltarien sare erraldoia osatuz”, Sareko kideen arabera. Hala, euskal herritar adina kilometro egin nahi dituzte herrietan piztuko diren hamarnaka iniziatibarekin. Hau da, 3.127.326 kilometro egitea da xedea bakarka, taldeka, familia giroan edo igandekoa bezalako iniziatiba antolatuetan. Egiten diren kilometroak batzeko aplikazioa jaitsi behar da sakelako telefonora, eta noski, martxak egin bitartean aplikazioa martxan izan.
Beraz, jarraian, igandeko deialdiak herrika eta barrutika:
- Lezo: 10:00etan abiatuko dira Gurutze Santuaren plazatik Jaizkibelgo bigarren torreoira joateko.
- Donibane: 10:00etan aterako dira Santiago plazatik Mitxintxolara joateko.
- Antxo: 09:30ean aterako dira Gure Zumarditik San Markora joateko.
- Trintxerpe: 10:30ean aterako dira Trintxer elkartetik Mendiolara joateko.
- Tontorretan, norberak eramandakoarekin hamaiketakoa.
- 12:00etan, suziriak jaurtiko dituzte.
