Milaka pauso, presoen auziaren irtenbidearen alde
98 lagunek mendi itzulia egin dute Iturriotzen hasi eta bukatuta. Presoen salbuespen egoera orokorrarekin bukatzeko eskatu dute.
Presoen auziari irtenbidea jartzeko eskatu zuten atzo. Atzo goizean, 98 oiartzuarrek kamiseta urdina jantzi, motxila hartu eta mendi buelta polita egin zuten, Iturriotz auzoan hasi eta bukatuta. Sarek deituta, 65 lagunek hamabi kilometroko itzulia egin zuten, eta beste 33 izan ziren ibilbide motzaren —sei kilometro— alde egin zutenak.
Euskal presoen auziari irtenbidea eskatzeko pausoak eman zituzten oiartzuarrek: guztira 960 kilometro gehitu zizkioten Izan Bidea sakelako telefonoko aplikazioari. “Elkarbizitzaren eta preso, iheslari eta deportatuen etxeratzeko bidean urrats bat gehiago eman genuen”, esan du Sarek.
COVID-19ak espetxeetan ere eragina izan duela gogorarazi dute. Horrela, Joanes Larretxea herriko presoak ia urte erdi darama bere bikotekidea eta 7 eta 8 hilabeteko seme-alabak besarkatu gabe. Ekainean hasi zen kristalaren atzeko bisitak izaten, baina elkarbizitzako bisak ez ditu izango hilabete bukaera edo abuztura arte.
“Zenbat hilabete egon behar du Joanesek bere 8 hilabeteko haur jaio berria besarkatu gabe? Zenbat hilabete bere 7 urteko semearekin jolasteko aukerarik gabe?”, galdetu du Sarek. Horregatik, salbuespen egoerarekin bukatu behar dela aldarrikatu dute.
“Egoeraren larritasunaren aurren Espainiako hainbat alderdi eta mugimenduk sinatutako dokumentuan adostutakoak dioen bezala, edo Eusko Jaurlaritzak aurkeztutako osasun txostenean eskatzen den bezala preso bakoitza bere probintziara gerturatu behar da”, gaineratu dute.
Irtenbidearen bidean lanean jarraituko dutela adierazi du Sarek: “Segi dezagun mugimenduan, eta segi dezagun bidean. Joanes eta gainontzeko euskal presoak etxeratze bidean jartzeko bidea dugu aurrean, mugi gaitezen oinez, bizikletan, dantzan, patinetean… baina aurrera beti, aurrera Oiartzun!”.
Bizikleta martxara deia
Sarek bizikleta martxa deitu du ostegunetik larunbatera bitartean (informazio gehiago, hemen). Oiartzunera larunbatean —hilak 25— iritsiko da. 09:30ean jarri dute zita, Matteoko bidegurutzean. Astigarragatik etorriko da Izan Bidea martxa.
Sarek hara joateko gonbita egin du, baita kamiseta urdinak janztekoa ere bai.
