Terrazek ordutegi berria izango dute
Establezimendua zabalik dagoen ordutegian terraza jartzeko baimena emango du udalak, egun osoz, ohiko ordutegiaren barruan.
Arkaitza taberna COVID 19 gaitzak eragindako salbuespenezko egoeraren aurrean, taberna eta jatetxeei ordutegi berria ezartzea erabaki berri du Errenteriako Udalak. Hala, terrazen ordutegia ostalaritza establezimenduen ordutegiari lotzea erabaki dute, hau da, egun osoz erabili ahalko dira terrazak, taberna zabalik dagoen ordutegiaren barruan.
Halere, 07:30ak baino lehen eta 01:30etik aurrera ostalariek ezingo dituzte kanpoko mahaiak jarri. Ordutegia asteko egun guztietan ezarriko dute, jai egunak barne.
Urri hasieran bertan behera geratuko da ezarritako ordutegia, eta «orduko errealitatearen arabera» egoera aztertuko duela iragarri dute. Hala eta guztiz ere, «pandemiaren garapenaren arabera» edozein unetan aldaketak egon daitezkeela zehaztu dute udaleko iturriek.
