Txostek garaipena behar du errebote txapelketan jarraitzeko
Lehenengo jardunaldian Luzean taldearen kontra galdu dute, errebotean. Larruzko paletan dabiltzanek etzi hasiko dute liga.
Txosteko pilotariek ez dute modu onean hasi Enrike Abril errebote txapelketa. Pasa den igande eguerdian Luzean taldearen kontra jokatu zuten Beheko Plazan. Donibane Lohizuneko taldea 3-13 nagusitu zen.
Txapelketan jarraitu ala ez jakiteko, igandeko partida hil ala bizikoa izango da Oiartzungo taldearentzat. Txostek Kanboarrak taldearen kontra neurtuko ditu indarrak Beheko Plazako pilotalekuan. Gipuzkoarren eta lapurtarren arteko partida 12:00etan hasiko da.
Igandekoa ez da Txosteko ordezkariak arituko diren partida bakarra. Larruzko paletako Gipuzkoako Txapelketan Txost1 eta EPLE1 taldeen arteko partida izango da larunbateko Madalensoron, 10:30ean. Modu horretan, Gipuzkoako Kluben Arteko ezker hormako txapelketa hasiko da. Lehen mailan arituko dira bi talde horiek 2021-2022 denboraldian.
