Zubietako errauste plantaren gaineko "herri kontrola" azalduko dute
Errausketaren Aurkako Mugimenduak 2021ko lagin bilketaren berri emango dute hilaren 17an. ToxicoWatch herbeheretarrekin batera ari dira lanean.
Errauste plantaren inguruan laginak hartu dituzte. Errausketaren Aurkako Mugimenduko boluntario talde batek Zubietako errauste planta inguruko laginak biltzen aritu zen urriko bigarren hamabostaldian. Aurtengoa hirugarren aldia da.
Errauste plantaren gaineko “kontrol herritarra” egiten ari da mugimendua, Herbehereetako ToxicoWatch fundazioarekin batera. Inguruko oilategietako oiloen arrautzak, landareen hostoak, goroldioa, lurra, ura eta erreketako sedimentuak kontrolatu dituzte.
Azterketa horren berri emango dute datorren asteazkenean, hilak 17. Zubieta Lantzen taldeko Maider Usabiagak 2021eko azterketa horren berri emango du. Batzarra udaletxeko pleno aretoan izango da, 19:00etan hasita.
Erraustegiaren kontrol herritarra Zubieta Lantzen elkarteak eta Erraustegiaren Aurkako Mugimenduak sustatutako ekimena da. Crowfunding bidez finantzatzen da.
Arrazoiak
“Kontrol herritar” hori egiteko hainbat arrazoi eman dituzte:
-
Erraustegiek gaur egiten dituzten kontrolek , –jabeari aurretik abisatuta egiteaz gain– ordu gutxi batzuetako emisioak neurtzen dituzte: erraustegiak 8.000 ordu egiten baditu lanean, horien %0,1 baizik ez.
-
Erraustegien jabeek beren nahieran erabiltzen dituzte Airearen Kutsadura Kontrolatzeko Mekanismoak.
-
Kontrolak egiten dituzte soilik erraustegia “ohiko funtzionamenduan” ari denean, baina jakina da kutsagarri gehienak isurtzen direla “ohikoak ez diren uneetan, labeen piztu-itzalietan, filtroen aldaketetan, eta abar)”.
-
Europar Batasunak soilik dioxinak eta furanoak soilik arautzen ditu baina ez beste kutsagarri organiko iraunkor asko: dl-PCBak, dioxina brominatuak eta PFOSak.
-
Erraustegien aldekoek diote tenperatura jakin batean desegiten direla dioxinak eta beste kutsagaiak, baina gero ez dago behar bezala bermatuta erretako masa guztian gutxieneko tenperatura hori lortzea.
-
Gaur egun etxeetako hondakinak gero eta neurri handiagoan jo ditzakegu hondakin industrialtzat, kiskaltzera bidaltzen diren materialen osaketagatik. Horregatik tenperatura handiagotan erretzea eskatzen dute, esaterako 1.100 gradu harrapatuz konbustio osteko gunean, eta ez gaur eskatzen diren 800 gradutan.
