Oiartzungo lehen Korrika Batzordea, ostiralean
Intxixu AEKn egingo dute Korrikaren gainekoak prestatzen hasteko lehen bilkura, 17:00etan hasita. Ekarpena egiteko interesa duen edonor joan daiteke.
21. Korrikaren (2019koa) irudi bat Oiartzunen. Jakina da 22. Korrika apirilaren 10eko 03:11n iritsiko dela Oiartzunera, Gurtzera (Irundik). Bada herrian AEKren martxa erraldoiaren harira egin daitezkeenak hitzartzen hasteko lehen bilkura, estreinako Korrika Batzordea, ostiral honetan egingo dutela jakinarazi du Intxixu AEK-k.
17:00etarako ezarri dute biltzeko ordua, Intxixu AEKn. Batzordea osatzeaz gainera, bertaratutakoek aukera izango dute Korrika iritsiko den egunerako eta aurrekoetarako zer egin daitekeen proposatzeko.
Martxoaren 31n hasiko da Korrika Amurrion (Araba) eta apirilaren 10ean egingo ditu azken urratsak Donostian. Beraz, herrira eta eskualdera azken egunean iritsiko da.
