Etxeko langileen egoeraren berri eman dute Emakumeen Etxean
SOS Arrazakeriak bere ikerketa bertaratutakoen aurrean azaldu du.
Aurkezpena Emakumeen Etxean egin zuen SOS Arrazakeriak. SOS Arrazakeriak etxeko langileei buruz abiatu duen ikerketaren emaitzak aurkeztu zituen atzo Errenteria-Oreretako Emakumeen Etxean. Bertara gerturatu ziren pertsonek lehen eskutik ezagutu zituzten ikerketaren emaitzen nondik norakoak.
Estatuan gizarteko %2,8k etxeko langile moduan lan egiten du. Horietatik %45 inguru kontraturik gabe dabil lanean. SOS Arrazakeriaren datuen arabera gehienak emakumeak dira, eta %40 inguru atzerritarrak.
Lan eskubideen atalak aurkezpenaren zati zabala hartu zuen. Izan ere, elkartearen arabera eskubide ugari urratzen dira etxeko langileen ogibidean. SOS Arrazakeria elkartearengana jo dutenek haurdunaldiagatik emandako kaleraketak, lan-erregularizazioarekin arazoak, edo langileen eskubideen erreklamazioak aipatzen dituzte arazo gisa.
Elkarteak mota horretako kasuak salatu dituela adierazi zuen, eta azken ekitaldian tramitatu dituen 57 kasuetatik 29tan langilearen aldeko epaia egon da. Beste 18 kasuetan epaiaren zain daude oraindik. Mota guztietako eskubideak eskatu behar dituztela adierazi du SOS Arrazakeriak: Kaleratzeengatik kalte-ordainketak, ez jasotako ordainsariak, oporrak eta jai-egunak, harreman laborala aitortzea…
Sarritan ematen diren eskubideen urraketa salatzea zaila dela azpimarratu zuen ere elkarteak. Adibide gisa, berrogei ordu baino gehiagoko lanorduak edo egoera txarrek osasunean eragiten dutena erakustea oso konplikatua zela aipatu zuten.
Aurkezpena amaitu ostean, bertaratutakoek galderak egiteko aukera izan zuten, eta testigantza pertsonal bat baino gehiago entzun zen Errenteria-Oreretako Emakumeen Etxean.
