ETBren saio baterako oiartzuar bila ari dira, herriko abesti zahar bat birgrabatzeko
'Gipuzkuan da herri lasai bat' izeneko kantua birgrabatzeko ahotsak behar dituzte. Maiatzaren 3an entseguak egingo dituzte, eta 5ean aldiz, ekitaldia.
ETB katea saio berri bat ari da prestatzen, “Euskal Herriko kanta zahar eta tradizionalen ondarearen” gainekoa, eta oiartzuar bila ari dira horretarako. Asmoa, hedabidearen arabera,”herrietan belaunaldietan zehar galdu diren abestiak herritarrei bueltatu ahal izatea” da. Herriz herri abesti ezberdinen historia ezagutarazi nahi dute, finean, “ikerketa lan sakon bat egin eta abestia birgrabatu” nahi dute.
Oiartzungo abesti bat aukeratu dute guztien artean, Gipuzkuan da herri lasai bat izenekoa hain zuzen. Herrian bertan grabatu nahi dute: maiatzaren 3an (asteartea da) ahotsen frogak eta entsegua egingo dituzte Arizmendi-Enea lorategian (15:00etatik aurrera). 5ean aldiz, 18:00etatik aurrera, ekitaldi bat egingo dute, herritarren aurrean kantatzeko.
Froga zein entseguetara joateko deia egin diete oiartzuarrei. Interesa dutenek 609 26 80 37 telefono zenbakira deitu beharko dute zerrendan sartzeko. Horren baitan antolatuko dute dena.
