TicketBAI sistema ezarrita duten eskualdeko merkatari eta ostalariek diru laguntza jasoko dute
"Merkataritzaren eta ostalaritzaren digitalizazio prozesua sustatzeko eta indartzeko" asmoz abiatu dute deialdia. Establezimendu bakoitzak, gutxienez, 1.000 euroko laguntza jaso ahal izango du.
Aldundiak jakinarazi berri du Eskualdean TicketBAI sistema ezarrita duten merkatari eta ostalariek diru laguntzak jaso ahal izango dituztela aurki. “Merkataritzaren eta ostalaritzaren digitalizazio prozesua sustatzeko eta indartzeko” asmoz abiatu dute deialdia, baita ere “sektore horien ekonomia eta enplegua suspertzeko”.
Enpresa bakoitzak 1.000 euroko laguntza jasoko du, eta beste 200 euro jasoko dituzte fakturak euskaraz aurkezten dituztenek. Honako baldintzak bete beharko dira eskaera egin ahal izateko: 2022ko urtarrilaren 1a baino lehen JEZko epigrafeetan altan emanda egotea; aurreko 15 egunetan TicketBAI sistemaren bitartez 15 faktura aurkeztea FakturaBAI edo Ef4kultur ez den bestelako software bat erabilita; 2022ko irailaren 1era bitarte gutxienez 120 faktura bidaltzen jarraitzea; eta azkenik, 2021eko deialdiko diru laguntzen onuradun ez izatea.
Eskaera egiteko inprimakia Zergabidean edo aldundiaren Erregistro Elektronikoan aurkeztu beharko da. Eskaerak egiteko azken eguna ekainaren 23a izango da, 12:00etan itxiko dute epea.
