"Errenteriako etxeetan aterpetutako kultura eta hizkuntza anitzak ikusgarri egitea dagokigu"
Kultur Aniztasunaren Nazioarteko Egunean adierazpen instituzionala kaleratu du udalak. Aho batez adostu dute testua.
Udaletxeko balkoian kultur aniztasunaren aldeko pankarta zintzilikatu dute gaur. Argazkia: Herri Bizia Gaurko (hilak 21) Kultur Aniztasunaren Nazioarteko Eguna probestuz, eta Errenterian 11 kolore programaren VII. edizioak datozen egunetan herria hartu duela kontuan hartuta, adierazpen instituzionala kaleratu du Errenteriako Udalak. Aho batez adostu dute ordezkaritza duten talde guztiek testua.
Udalak herrian bizi diren hizkuntza eta kultura guztien eta haien eramaile diren pertsonekiko aitortza publikoa egin nahi duela dio lehenik testuak. Horrez gain, “bakearen bermerik onena delakoan”, herriko kultura anitzen arteko elkarrizketa ahalbidetu nahi dutela erantsi dute, azken urteotan “irekitako bide emankorrean sakonduz”.
“Gaur kalea hartzea dagokigu, Errenteriako etxeetan aterpetutako kultura eta hizkuntza anitzak ikusgarri egitea. Eta, hori baliatuz, elkartzeko topaguneak berreskuratzea, kultura ezberdinen arteko harremanak modu presentzialean josten jarraitzeko”.
Ondorengo konpromisoak hartu dituzte adierazpena sinatu duten taldeek:
-
Bizikidetza linguistiko eta kulturalaren bidean herriko eragile ezberdinekin lanketa bateratuak garatzeko, nagusiki Elkarbizitzarako eta Gizarte Ekintzarako Udal Kontseilua baliatuz horretarako.
-
Errenteriako herritar oro eskubide eta aukera guztien jabe izan dadin lanean jarraitzeko, herritarraren jatorria edo kultura edozein izanik ere, herrikide hauei herritartasun osoa aitortua izan dakien.
-
Kultura ezberdinen arteko topaguneak sortzen jarraitzeko, kulturen artean sinergiak sorraraziz eta ekimen bateratuak sustatuz. Horretarako espazio esanguratsu izango dira Lekuona Fabrika edota Emakumeen Etxea.
-
Hezkuntzaren esparruan herriko gazteenekin lanketak egiten jarraitzeko, Errenteria kultur aniztasunarekiko errespetuan hezteko ahaleginean.
-
Errenteriako hizkuntzen aniztasuna balorean jartzen jarraitzeko, hizkuntza oro aitortuz eta ezberdinen arteko topaguneak sortuz, aurkeztu berri dugun hizkuntzen mapa abiapuntutzat hartuaz eta BADALAB hizkuntza berrikuntzarako laborategiarekin elkarlanean jardunaz.
-
Gure herriko aniztasun kultural eta linguistikoa bistaratzeko ekimenak burutzen jarraitzeko, egun honen harira osatutako programazio zabalaren gisako ekimenak antolatzen jarraituz.
