Banketxeek erretiratuei erraztasunak emateko mozioa, aurrera
Maiatzeko ohiko udalbatzarra egin zuten atzo arratsaldean. Duintasuna erretiratuen elkarteak aurkeztutako mozioa onartu zuten, besteak beste.
Kalera aterako dira berriro pentsionistak. Maiatzeko ohiko udalbatzarra egin zuten atzo arratsaldean udaletxeko pleno aretoan. Besteak beste, Duintasuna erretiratuen taldeak aurkeztutako mozio bat landu zuten, banketxeen zerbitzuen gainekoa. Adinekoentzako erraztasunak eskatu zituen Joxe Iriarte Bikilak taldearen izenean, “digitalizazioarekin asko aldatu baita banketxeen funtzionamendua eta zailtasunak ekarri dizkio gure kolektiboari”. Sei puntuko mozioa aurkeztu zuen Duintasunak, gehienak aho batez onartu zituzten. Horietako bostek zinegotzi guztien babesa jaso zuten, baina batean EAJ taldea abstenitu egin zen. Halere, EH Bildukoen aldeko botoei esker, aurrera atera zen mozioa.
Mozio honetan, lehenik, erretiratuei eta zaurgarrienei bankuko zerbitzuak erabiltzeko erraztasunak emateko jaso zuten, “behartuak baikaude gure dirua banketxeetan gordetzera”, Bikilaren hitzetan. Bestetik, erabilera sozialetako jardueretan komisiorik eta mugimendu sozial gisa ez kobratzeko eskatu zuen Duintasunak. Azkenik, garaia Euskal Herrian banketxe publiko bat sortzeko garaia dela aldarrikatu zuen. Eskaera horiek bereak egingo ditu udalak.
Gainerako puntuetan erabateko adostasuna izan zen, aho batez onartu zituzten. Oiartzungo zaintza ekosistema publiko-komunitarioa sortzeko Zabalduz kooperatibarekin hitzarmena sinatzea onartu zuten atzokoan, “zaintza sarea hobetzeko eta auzolanaren kontzeptua auzo zaintzara eramateko” asmoz. Proiektu honek 199.875,57 euroko aurrekontua izango du.
Bestalde, herriko kirol eta kluben funtzionamendurako diru laguntzak onartu zituzten, aho batez ere. 47.064,67 euro banatuko dituzte ondorengo taldeen artean: Oiartzun Kirol Elkartea, Txost, Haurtzaro Kirol Elkartea, Oiartzungo Saskilagunak, Hiruki gimnasia elkartea, Tximeleta eta Delta Klub Haize.
