"Berezia" izango da hirugarren Kilometro Lezo jaialdia
Datozen hiru asteburuetan musika, dantza, antzerkia edota zirkuarekin gozatzeko aukera izango dute lezoarrek. Aurten gainera, herriko eta inguruko hainbat musikarik kontzertu bana eskainiko dute, aire librean.
Gaur aurkeztu dute hirugarren edizioa. Pandemiak azken bio edizioak baldintzatu baditu ere, ohiko normaltasunean egingo dute hirugarren Kilometro Lezo jaialdia. Ostiral honetan (hilak 19) abiatuko da aurtengoa, eta irailaren 3an bukatuko dute, herriko eta eskualdeko hainbat musikariren emanaldiekin.
Gaur aurkeztu dute hirugarren edizioa, Jesus Maria Matiarena alkatearekin batera hainbat zinegotzi eta jaialdian parte hartuko duten musikariak izan dira. Bertan nabarmendu duenez, “berritasunez josita” dator aurtengoa, izan ere, aurten hamabi kontzertu eskainiko dituzte, etenik gabe, 16:00etatik 00:00etara. Bi eszenatoki egokituko dituztela aurreratu dute, batetik bestera egingo du salto musikak; kontzertu bat bukatzean beste agertokian izango da hurrengoa.
Programa “oso biribila” egokitu dutela nabarmendu nahi izan dute gaurkoan, musikaz gainera, antzerkia, zirkua edota dantzarekin ere gozatzeko aukera emango baitu aurtengoak. “Herri txikia da baina oso handia artista aldetik”, esan du Orratx! antzerki taldeko Lierni Fresnedok. Hainbat sorpresa ere egongo direla aurreratu dute antolatzaileek.
Emanaldi guztiak Herri Eskolako patioan izango direla zehaztu du alkateak, aire librean. Doakoak izango dira saioak, baina edukiera kontrolatzeko asmoz sarrerak aldez aurretik hartu beharko dira, hemen: udalaren webgunean edota APP- an.
Ondorengoa da aurtengo egitaraua, osorik:
- Hilak 19, ostirala. 20:00etan, Nuvanut (Myriam Perez).
- Hilak 20, larunbata. 20:00etan. Mikra (Berdinki Zirkua).
- Hilak 26, ostirala. 20:00etan, Akabo (Barsanti Teatroa).
- Hilak 27, larunbata. 20:00etan, Maña (Manolo Alcantara).
- Irailak 2, ostirala. 20:00etan, Ay Karmela! (Orratx Antzerki Taldea).
- Irailak 3: Musika Taldeen Erakustaldi erraldoia:
- 16:00. Gotzen, Musika Eskolako Banda.
- 16:20. Ilargi Arrizabalaga.
- 16:40. Caste.
- 17:00. La Basu.
- 18:00. Cliché.
- 18:30. Noa & the Hell Drinkers & friends.
- 19:45. The Fake Cousins.
- 20:15. DJ Rock & roll eta DJ Artie Escolar.
- 20:30. Love 23.
- 20:50. Liher.
- 22:15. DJ Artie Escolar.
- 22:45. La La Love You
