[Argazki galeria eta bideoa] Oroimenaren eta egiaren bidean urrats berri bat
Arizmendieneko lorategian Oroimenaren Txokoa inauguratu dute, oroimenak eta egiaren ezagutzak bizikidetzan duen garrantziaren oroigarri.
Iragorri eskultura, Oroimenaren Txokoa. Gaur eguerdian bizikidetza eraikitzen jarraitzeko oroimenaren eta egiaren bidean, urrats berri bat eman du Oiartzungo Udalak Aranzadi Zientzia Elkartearekin batera: Oroimenaren Txokoa aurkezteko ekitaldia egin dute. Oiartzungo Udaleko ordezkariez gain, Javi Buces Aranzadi Zientzia Elkarteko kideak, Anton Mendizabal eskultoreak, eta Alaia Martin bertsolariak parte hartu dute ekitaldian.
Arizmendieneko lorategian ekitaldi berezia prestatu dute. Alde batetik, Aranzadi Zientzia Elkarteak sortu duen Oroimena Oiartzun webgunea aurkeztu dute; 2020an Oiartzungo Udalak Aranzadi elkartearekin sinatutako hitzarmenaren fruitua izan dena. Orain artean elkarteak aztertutako giza eskubideen urraketak jasotzen ditu webguneak. Bestetik, azken bost urteotan martxan egon den bizikidetza mahaiak egindako urratsen berri eman dute. Eta azkenik, Oroimenaren Txokoa inauguratu dute.
Eguerdiko 12:00etan puntu-puntuan hasi da ekitaldia. Lartaungo txistulariek ongietorria eman diete bertaratu diren guztiei. Ondoren, Jexux Leonet Oiartzungo alkateak, Eneritz Arbelaitz alkateordeak, Javi Buces historialariak eta Yon Goikoetxea zinegotziak hitza hartu dute, giza eskubideen urraketen ikerketaren nondik norakoak azaltzeko, oroimenak eta egiak bizikidetzarako duen garrantzia nabarmentzeko, eta urte hauetan guztietan hori ahalbidetzeko eman diren urratsak azaltzeko.
Ekitaldiaren bukaeran Oroimenaren Txokoa izan da protagonista. Anton Mendizabal eskultoreak sortutako obrak (Iragorri da eskulturaren izena) gorpuztuko du aurrerantzean txoko berezi hori. 1967an Luis Peña Gantxegik egindako frontoi pareta aurrekari gisa eta Jorge Oteizaren frontoiko paretaren inguruko pentsamendu poetikoari helduz sortutako obra da. Eskulturan frontoi pareta bat ikus daiteke, zerua irudikatzen duena. Obra, aldiz, lurrean dago kokaturik. Beraz, nolabait, eskulturak lurretik zeruranzko bilaketa irudikatu nahi duela azaldu du Mendizabalek.
Ondoren, Alaia Martinek bertso hunkigarri bat abestu du Egunsenti batean kantuaren doinuan. Eta azkenik, Olarriko dantzariek Lartaungo txistulariez lagunduta aurreskua dantzatu diete Oiartzungo Udaleko ordezkariei.
Hona hemen ekitaldiko zenbait irudi:
