Kolonbiako bi buruzagi Emakumeen Etxean izango dira
Yeny Tascón eta Yoana Acosta Zapata buruzagi indigenek hitzaldia emango dute asteartean. Indarkeriarik gabeko bizitza baterako estrategia komunitarioak partekatuko dituzte bertaratutakoekin.
Emakumeen Etxea [Arg.: Herri Bizia]. Datorren asteartean (hilak 14), Kolonbiako indarkeriarik gabeko bizitza baten aldeko estrategia komunitarioak izeneko hitzaldiak hartuko du Emakumeen Etxea. Yeny Tascón eta Yoana Acosta Zapata buruzagi indigenek emango dute. 18:00etan hasiko dute, eta irekia izango dela aurreratu du udalak.
Gipuzkoako hainbat udalerritan bira egiten ari da bikotea, Kolonbiako emakume indigenak subjektu politiko gisa aitortuta eta indarkeriarik gabe izeneko proiektuaren barruan egindako lana zabaltzen ari dira.
Tascón Chamí herriko emakume indigena da, Karmata Rua (Antioquia, Kolonbia) antzinako lurraldean jaio eta hazitakoa. Bertako Erakunde Indigenako genero aholkularia da, baita Bernandino Panchí Landa Eremuko Hezkuntza Zentroko irakasle.
Acosta, berriz, emakume Nasa indigena da, emakumeen eskubideen defendatzaile eta Çxhab Wala Kiwe – Cauca Iparraldeko Kabildo Indigenen Elkarteko (ACIN) Emakume Ehunaren koordinatzailea.
Bikoteak indarkeriarik gabeko bizitza baterako estrategia komunitarioak partekatuko ditu bertaratutakoekin, emakume indigenen ahalduntze prozesuetatik eta komunitateen sentsibilizaziotik abiatuta.
