Altzateko eta Olatzarreko kaleetan emakumeen izenak nahi ditu PSE-EEk
Udal aurrekontuen %3 "gizonen eta emakumeen arteko desberdintasunei aurre egiteko" erabil dadila eskatu du Joxean Sanchezek.
Lezon egiten ari diren etxebizitza multzo berriek sortuko dituzten kaleetan emakumeen izenak nahi ditu Lezoko PSE-EEk. Zehazki, Olatzar eta Altzate eremuetan proposatu du jartzea emakumeen izenak, “Lezon jaiotakoak izan ala ez”. Joxean Sanchez sozialisten udal eledunaren arabera, “Lezoko kaleek emakumeak baztertzen dituzte, eta nomenklaturan emakumeen bazterketa iraultzen saiatu behar dugu”.
Horren harira, eta Martxoaren 8a asteazkena dela baliatuz, mozioa erregistratu dute PSE-EEko kideek “gizonen eta emakumeen arteko desberdintasunari aurre egiteko” %3ko diru dotazioa eskatuz udal aurrekontuetan. Aldi berean, Sanchezek iragarri du Turkia eta Siriako lurrikaretan kaltetu izan direnei laguntzeko, Lezok diru ekarpena egin dezala eskatzeko mozioa erregistratu duela.
Sanchezek oroitarazi du ez dela asko udalak III. Berdintasun Plana onartu duela, 50 ekintza zehatzekin. “Hori garatzeko ezinbestekoa da Berdintasun Sailak behar besteko finantzaketa izatea Berdintasunaren alde erregistratutako mozioan jasotako beste eskaeretako bat genero-estereotipoak ezabatzeko lan egiten duten kultura-, hezkuntza-, aisialdi- eta astialdi-programa gehiagotan jartzeko”.
Martxoaren 8ko jarduerekin bat egin dezatela eskatu die Sanchezek Lezoarrei.