Euskararen uzta izango dena guztien artean erein nahi dute
Udalak datozen bost urteetarako plana osatu nahi du. Horretarako herritarren parte hartzea bilatuko dute, ‘Euskaraz urtabe’ lelopean. Galdetegi bat bete dezakete oiartzuarrek.
Oiartzungo Euskara Batzordeko kideak. Urtabe hitzak uzta oneko urtea esan nahi du. Oiartzungo Udaleko Hizkuntza Normalizaziorako Sailak urte bakarra ez, datozen bost urteak urtabe izatea nahi du: Euskara Plan berria osatu nahi dute, aurrekoa agortu baita.
«Plan batek ematen dizu aukera lanak antolatzeko. Diagnosia egin eta lehentasunak finkatzeaz aparte, egin beharreko lana da zein baliabiderekin egin nahi dugun zehaztea, zer pertsonal, baliabide ekonomiko eta azpiegitura behar diren», azaldu du Aitziber Arnaiz saileko teknikariak.
«Euskara planak egin daitezke ordenagailu baten aurrean, edo parte hartze prozesu baten bitartez», gaineratu du. Horregatik, 2012an egin bezala, herritarren parte hartzea bilatuko dute sortuko duten plan berrian.
Ordukoa «luze, zabal, parte hartze handikoa eta emankorra» izan zela berretsi du Arnaizek, eta aurtengoa antzekoa izatea nahi dute. Ahize-AEKren laguntza jasoko dute.
Planera iristeko bidearen garrantzia nabarmendu du: «Askotan, prozesua bera da emankorra, jendeak parte hartu eta hausnartzen duelako. Inplikazioak eta harremanak sortzen dira, baita erreferenteak ere».
Gisa horretako parte hartze prozesuak «eragingarriak» direla gaineratu du, «denen artean» sortutako plana delako, «adostasunean oinarrituta». Arnaizek aitortu du horrelako planek lan handia eta dirua behar dituztela aurrera ateratzeko. Aurtengo aurrekontuan sartu dute.
Plana aurrera eramateko talde eragilea sortu dute. Bertan izango dira, «prozesuaren urratsak markatzen», honako ordezkariak: Ahize-AEK, Hizkuntza Normalizazioko zinegotzia, udaleko Parte Hartze eta Komunikazio teknikaria, Oarsoaldeko Euskara Batzordeko teknikaria, UEMAkoa, eta Hizkuntza Normalizazioko teknikaria bera. Azken hori Ahize-AEK-ko Maialen Otegi eta Itsaso Uitzirekin gehiagotan biltzen da, lan teknikoak egiteko.
Prozesuaren lehenengo pausoa izan da hura aurkeztu eta herritarrengana iritsaraztea. Galdetegi bat zabaldu dute, eta euskararen arlotik egiten diren ekintzei buruzko iritzia jakin nahi dute, besteak beste. Hori bai, eskaera bat egin du Arnaizek: «Ezagutzen ez dituzten jardueretan Ez dakit erantzuteko eskatzen dugu, hartara guk ere jakin dezagun nora iristen garen, eta zer egiten dugun gaizki».
Euskaraz erantzun daiteke galdetegia, baina baita gazteleraz ere, denengana iritsi nahi baitute.
Plana, udazkenerako
Galdetegiek datu batzuk emango dituzte, eta horiei datu soziolinguistikoak zein aurrez herrian egindako ikerketa eta hausnarketak batuko zaizkie, diagnosia sortzeko. Gero eragileekin partekatuko dute emaitza.
Ekainean eta irailean arlokako eztabaida taldeak sortuko dira: arlo sozioekonomikoa, familia, aisia… Gazteekin talde bat sortu nahi dute, arlo horiek beraien ikuspegitik nola ikusten dituzten jakiteko. Gauza bera egiten saiatuko dira haur eta nerabeekin. «Helburua da ahalik eta jende gehienak parte hartzea eta ahalik eta iritzi gehien jasotzea, argazki osoago bat ateratzeko».
Herritarrekin, diagnosia partekatzeaz gain, herrian euskara sustatzeko lehentasunak finkatu nahi dituzte. Hainbat dinamika prestatuko dituzte Ahize-AEK-ko teknikariek. «Helburua da udazkenerako edukitzea datozen bost urteetarako euskara plana, lehentasunak eta urratsak markatzeko». Eusko Jaurlaritza egiten ari den Euskara Sustatzeko Ekintza Plana (ESEP) indarrean egongo da ordurako, eta horren gainean diseinatuko dute Oiartzungo plana; ESEPek ez du adostutakoa baldintzatuko.
Herritarrekin euskararen hazia erein nahi dute, etorkizunekoak urtabe izan daitezen.
