Haur parkeak hobetzea, Gobernu Taldearen lehentasunetako bat
Haur parkeak hobetzeko konpromisoa berretsi du Lezoko Udaleko Gobernu Taldeak eta udala lezoar familiekin elkartzeko prest dagoela esan dute.
Herriko haur parkeen egoeraz kezkatuta daude lezoarrak. Bi astez jarraian kalera irten dira parkeak hobetu ditzaten eskatzera. Eskakizun horien harira, Lezoko Udaleko Gobernu Taldeak parkeak hobetzeko duen konpromisoa berretsi nahi izan du, eta datorren legegintzaldira begira, haur parkeak hobetzea Lezoko Udaleko Gobernu Taldearen lehentasunetako bat izango dela nabarmendu dute.
Herriko parkeak hobetzeko hainbat jarduera martxan eta beste zenbait proiektu aurreikusita dituela azaldu du Gobernu Taldeak. Eta zentzu horretan lanean jarraitzeko, ‘Lezoko Ttikiak’ izenpean ekartu diren familiekin elkartzeko prest daudela gaineratu dute; hobekuntzak eta ekarpenak jasotzeko bai eta Udala lantzen ari den proiektuak azaltzeko ere. Ekarpen horiek “oso positiboak” izango direla uste dute.
“Lezoarren ongizatea hobetzeko lana egiten dugu beti eta txikienei arreta berezia jartzen jarraitu nahi dugu. Beraiek dira Lezoarren etorkizuna eta zaindu egin behar ditugu; ahal dugun guztia egingo dugu horretarako” esan dute.
