Mondrate kanporatu dute oiartzuarrek, jaun eta jabe izan diren partidan. Futbolean, neskek berdinketa lortu dute, eta mutilek, porrota.
Asteburuan hasi da areto futboleko Gipuzkoako Kopa. Oiartzun Kirol Elkarteak modu onean hasi du txapelketa, Mondrate kanporatu baitu.
Oiartzuarrek partida kontrolpean izan zuten, hasieratik bukaeraraino. Defentsa sendoarekin, eta erasoak gauza politak eginez, 2-0 iritsi ziren aldageletara.
Bigarren zatia bide beretik joan zen, eta oiartzuarrek beste bi gol lortu zituzten (4-0 bukatu zen). Datorren asteburuan jokatuko dute bigarren kanporaketa.
Futbolean, ez hain ongi
Futboleko bi talde nagusien artean artean puntu bakarra eskuratu zuten. Neskak izan ziren, Karla Lekuonan jokatutako partidan, puntua erdiestea lortu zutenak.
Larunbateko berdinketak zapore gazia utzi die oiartzuarrei. Izan ere, partidaren une gehienetan Parquesol baino askoz hobea izan ziren oiartzuarrak, eta aukera ugari sortu zituzten.
Nahiak bakarkako jokaldi polit batean aurreratu zituen oiartzuarrak. Hurrengo jokaldian, baina, Valladolidekoek berdindu zuten, zelai erdiko lehia batean Oiartzungo jokalariak baino indartsuago aritu zirelako.
Aurreko partidarekin alderatuta partida hobea egin zuten arren, oraindik maila pixka bat hobetzea falta zaie garaipenen bat lortzeko.
Mutilen talde nagusiari dagokionez, Eibar Bren zelaian jokatu zuten, eta nabaritu zen etxekoek erritmo puntu bat gehiago zutela. Modu horretan, aldageletara 3-0 galtzen joan ziren oiartzuarrak.
Bueltan hobeto atera ziren, eta bukaerarako hogei minutu falta zirela gola lortu zuten. Bost minutura beste aukera garbi bat eduki zuten oiartzuarrek, baina ez zuten asmatu.
Bukaeran eibartarrek laugarrena lortu zuten.
Emakumeen 3. RFEF Maila
- Oiartzun — Parquesol: 1-1.
Gizonezkoen Ohorezko Erregional Maila
- Eibar B— Oiartzun: 4-1.
Emakumeen Euskal Liga
- Añorga B — Oiartzun B: 2-1.
Gizonen Lehen Erregionala
- Oiartzun Bk hilaren 24an hasiko du liga.
Emakumeen Ohorezko Erregional Maila
- Oiartzun Ck hilaren 24an hasiko du liga.
Mutilen Gazte Mailako Euskal Liga
- Danok Bat B — Oiartzun: 4-0.
Mutilen Gazte Mailako Gorengo Maila
- Oiartzun B — Usurbil: 3-3.
Mutilen Gazte Mailako Lehen Maila
- Oiartzun Ck hilaren 24an hasiko du liga.
ARETO FUTBOLA
Gizonen Gipuzkoako Lehen Maila
- Oiartzun KE — Mondrate: 4-0.
Gizonen Gipuzkoako Bigarren Maila
- Miren Taberna OKEk urriaren 1ean hasiko du liga.
