Oiartzungo Turismo Bulegoak 2.000 bisitaritik gora jaso ditu
Iazko datuekin alderatuta, bisitarien kopurua %30 hazi da. Jatorriari dagokionez, oiartzuarrak izan dira gehienak, bertako ekitaldietan parte hartzeko.
Oiartzungo Turismo Bulegoa Arizmendienean irekitzen dute. Oiartzungo Turismo Bulegoak aurtengo udan izan dituen datuen berri eman dute. Uztailaren 1etik irailaren 2ra bitartean eman du zerbitzu.
2.030 bisitariri egin diete harrera. 688 lagun izan ziren uztailean, 1.301 abuztuan eta 61 irailean. Iazko datuekin alderatuta %30 igo da bisitari kopurua.
Oiartzuarrak izan dira bertaratu diren gehienak (%42). Herriko ondarea ezagutzeko antolatzen diren bisita gidatuetan parte hartu dute, edo museoei buruzko informazioa jaso dute.
Gipuzkoako beste herrietatik (%16), Herrialde Katalanetatik (%9), Frantziatik (%8) eta Gaztela eta Leondik (%6) ere jende asko etorri dela jakinarazi du Oiartzungo Udalak.
Tren Berdeak, arrakasta
Bulegoaren erabiltzaileen artean interes handiena piztu duen jarduera Arditurriko Tren Berdea izan da. Uztaila eta abuztuan asteazkenero eskaini dituen bi bidaietan 668 pertsonek hartu dute parte.
Arizmendieneko eta Doneztebe Elizako doako bisitak ere oso jendetsuak izan dira: 216 lagunek ezagutu zuten etxe-museoa eta 142k eliza.
Arditurri, Soinuenea eta Luberri museoek interes handia sortu dutela adierazi du udalak. Herriko bestelako interesguneen zein mendi ibilbideen informazio eske joan dira.
Euskara izan da bisitariak artatzeko gehien erabili den hizkuntza (%52). Gaztelania (%39), frantsesa (%8) eta ingelesa (%1) ere erabili dira.
Balantzea, “positiboa”
Aurten iaz baino 381 bisitari gehiago izan dira, eta udala zein turismo bulegoko koordinatzaileak pozik daude kopuruekin. “Datuek berresten dute antolatu diren bisita gidatuak eta jardueren eskaintzak oso erantzun positiboa izan dutela aurten ere”, gaineratu dute.
Turismo bulegoa itxita dago, baina berretsi dutenez, herriko ondarea ezagutarazteko eskaintzarekin jarraituko dute datozen hilabeteetan.
