Urbasako hilketa bikarioa salatu dute
Oiartzungo Feministen Asanbladak deituta, elkarretaratzea egin dute gaur arratsean. Indarkeria matxista "lehen mailako" arazotzat jotzea eskatu dute.
Oiartzungo Feministen Asanbladak deituta, elkarretaratzea egin dute gaur arratsean Oiartzungo plazan. Hamarnaka lagun elkartu dira bertan, eta indarkeria bikarioa salatu dute, indarkeria matxistaren beste aurpegi bat.
Mateo 7 urteko haurra hil zuen bere aitak, bere buruaz beste egitearekin batera. Bukaeran irakurritako adierazpenean, elkartasuna adierazi diete haurraren senide eta gertukoei, indarkeria matxista lehen mailako arazo politikotzat jotzea eskatzearekin batera.
Honakoa da irakurri duten testuaren edukia:
Lizarratik iritsitako albiste eta susmo txarrekin hasi genuen astea, eta espero genuen berririk txarrena baieztatu zen asteartean; amak bere semea aitarekin batera desagertuta zegoela salatu ostean, aitak bere buruaz beste egin zuen 7 urteko semea hiltzearekin batera.
Lehenik eta behin, Euskal Herriko Mugimendu Feministatik gure babes eta elkartasun guztia adierazi nahi diegu senide, lagun eta gertukoei. Ez zaudete bakarrik.
Erailketa honekin, 12 dira 2003az geroztik indarkeria matxistak, zehazki indarkeria bikarioak, Euskal Herrian erail dituen haurrak. Eta aurten, 2023an, indarkeria matxistaren ondorioz gertatutako bosgarren hilketa izan da.
Aski da! Nazkatuta, amorratuta eta haserre gaude! Urteak daramatzagu esanez sistema heteropatriarkal, kapitalista eta arrazistak egituraz sostengatzen duela indarkeria matxista, eta horren azken ondorio lazgarri eta ikusgarriena erailketa dela. Baina, guk badakigu indarkeria matxistak hamaika aurpegi dituela eta emakumeok* bizitzako alor guztietan jasaten dugula indarkeria hori.
Indarkeria matxistari aurre egiteko, lehen mailako arazo politikotzat hartua izan dadin eskatzen dugu. Egungo jarrera konplizeak alboratu eta bizi garen jendarte antolaketa sexistari aurre egiteko benetako neurriak behingoz har daitezela exijitzen dugu. Gure bizitzak daude jokoan!
Honekin batera, autodefentsa feministarako deia egiten dugu. Bizitzaren aldeko apustu erradikala egiten dugu eta badakigu antolakuntza eta autodefentsa izango direla gure tresna eraginkorrenak. Feministok erantzuteko prest gaude! Martxan jarraituko dugu, aske izan arte! Gora borroka feminista!
