Marrazki bizidunez beteko da Donibane otsailaren 10ean
Aurtengo Inauterietan marrazki bizidunez mozorrotzeko deia egin die herritarrei Meipiko Jai Batzordeak. Egun osoko egitaraua ondu dute otsailaren 10erako.
Iazko Inauterietan ateratako irudia da goikoa. Sanjuandarrek ere aukeratu dute aurtengo Inauterietan zertaz mozorrotuko diren. Marrazki bizidunak izango da aurtengo gaia, Meipiko Jai Batzordeak, Aiton Amonen Elkarteak, Pasai Donibaneko Jai Batzordeak eta Xantixa Kultur Elkarteak aurreratu berri duenez. Otsailaren 10erako (larunbata da) ondu duten egitaraua aurkeztu diete barrutiko bizilagunei, egun osokoa izango da. Honakoa da egitaraua:
- 11:00: Topaketa egingo dute zaharren egoitzan eta desfilean abiatuko dira Meipira.
- 13:00: Desfilea abiatuko da, Meipitik plazara.
- 14:30: Sabelak betetzeko bazkari autogestionatua egingo duten Meipin jarriko duten karpan.
- 18:00: Arratsaldeko desfilea, Plazatik Meipira.
- 19:00: Mozorro lehiaketa egingo dute Meipin. Ondoren, DJek dantzan jarriko dituzte bertaratutakoak.
Bazkarirako txartelak eskuratzeko zein arratsaldeko mozorro lehiaketan parte hartzeko izena eman beharko da aurretik, Meipiko Jai Batzordearen sare sozialen bidez. Hiru sari banatuko dituzte arratsaldekoan: banakako mozorro onenari; taldekako mozorro onenari; eta zozketa egingo dute partaide guztien artean.
Antxopo Topaguneak eta Trintxerpeko Korkoiburuek ere aukeratu dute zertaz mozorrotuta irtengo diren kalera aurtengo Inauterietan. Antxotarrek EITB gaia aukeratu dute, eta trintxerpetarrek berriz, musika taldez jantziko dira.
