Iritsi da Escalerillaseko epaia
Etxebizitza Sindikatuak adierazi du epaileak saihestu egin duela isilbidezko subrogazioa zegoen ala ez erabakitzea. Bizilagunak eta sindikatua erabakia apelatzea aztertzen ari dira.
Astelehenean Escalerillaseko bizilagunen aurkako epaiketa egin zen Donostiako auzitegian. Epaiketa azkarra eta laburra izan zela jakinarazi zuen Etxebizitza Sindikatuak, eta epaia datozen egunetan iritsiko dela zehaztu zuten. Atzo ezagutarazi zen epaia.
Etxebizitza Sindikatuak gogorarazi du prozesu judiziala prekarioko uztarazpen prozedura bat zela, eta horren aurrean errekurtsoa jarri zutela, isilbidezko subrogazioa gertatu zen egoera zela argudiatuz: “Hau da, gure ustez, prekarioko prozedurak, maizterrak baimenik gabe (higiezinak usurpatzen) bizi izan zirela onartzen zuenak, ez zuen zentzurik; izan ere, maizterrak hainbat hamarkadatan bizi izan ziren etxebizitza horietan, portuarekin elkarrizketak izan zituzten, jabetzari eusteko ekonomikoki emandako errenta ordaindu zuten, eta, are gehiago, portuarekin lan lotura izan zuten”.
Sindikatuak salatu du jasotako epaiak “saihestu” egiten duela isilbidezko subrogaziorik egon den ala erabakitzea: “Horren ordez, formalismo batean ezkutatzen dela uste dugu. Izan ere, epaileak aintzat hartu ditu demandatzailearen uziak, auziaren xede den higiezina, ustez, ez zitzaiolako jaregin jabari publikoko ondasun izaerari. Horrela balitz, isilbidezko subrogazioa ez litzateke existituko jabari publikoko ondasunetan”.
Prozesu judizial osoa Escalerillaseko blokea ondare izaerako ondasun bat bezala oinarri hartuta garatu dela adierazi du Etxebizitza Sindikatuak: “Hau da, erakunde publiko baten jabetzakoa izan arren (portua), higiezin hori pribatua da (portuaren titulartasuna du, baina ez portuko jarduerak garatzeko jabetza).
Eskatzailea den portua eta demandatuak premisa batetik abiatu zirela nabarmendu du sindikatuak: “Blokea jabari publikoko ondasunaren izaeratik aldendu zen, eta etxebizitza blokea portuko ondare ondasun bihurtu zen. Izan ere, 2006ko uztailaren 19an, Sustapen Ministerioak argitaratu zuen blokea desafektatzea erabaki zuela, jabari publikoko ondasunaren izaera kenduta. Epaileak, ordea, esan du prozedura honetan ez dela inoiz egiaztatu prozedura 2006ko desafektazioa bukatu izana. Eta, horretarako, Herri Administrazioen Ondareari buruzko legearen artikulu batzuk aipatzen ditu, jabari publikoko ondasunen jaregitea eraginkorra izan dadin. Hori Ogasun Ministerioaren akta batean edo Estatuko Ondarearen Zuzendaritza Nagusiaren akata batean jaso behar deka diote”.
“Akta horietakoren bat egin bazen, ahozko epaiketan ez portuak ez guk ez genuen informazio hori. Beraz, informazio hori izan ezean, epaileak honako presuntzioa aplikatu du: blokea jabari publikoko ondasun bat dela uste izan behar da, non eta ez den frogatzen arauak eskatzen duen akta hori egin zela, eta, beraz, ez dagoela subrogaziorik”, esan du sindikatuak.
Sindikatuaren balorazioa
Etxebizitza Sindikatuaren arabera, “formalismo huts batean” oinarrituta (desafektazio prozesua akta batean ustez ez argitaratzea), “ontzat eman da zentzurik ez duen prozedura bat”. Sindikatuak adierazi du Escalerillaseko bizilagunek ez dutela “higiezin bat usurpatu”, baizik eta beren diru sarrerekin eta lanarekin jabetzari eusteko ekarpena egin duten langile familiak direla esan dute.
Epai judizialari dagokionean, apelatzeko dituzten aukerak baloratzen ari direla jakinarazi du sindikatuak: “Desafektazio prozesua bukatu izan balitz, abiapuntu berera itzuliko ginateke, zalantzarik gabe. Une honetan, aukera guztiak aztertzen ari gara”. Prozedurak aurrera egingo balu, Pasaiako Portu Agintaritzak (PPA) epaia betearaztea eska dezakeela esan du sindikatuak, eta jaurtiketa data aurtengo irailean irits daitekeela gaineratu dute.
Bestalde, PPArekin negoziatutako alternatibak aldarrikatzen jarraituko dutela adierazi du Etxebizitza Sindikatuak: “Etxetik kanporatuko dituzten pertsonek, haiekin zerikusirik ez deun proiektu bat egiteko, beren bizitza bermeekin garatu ahal izatea bermatuko duen alternatiba. Oraindik ere harrituta gaude enpresa pribatu baten interesetarako balioko duen trenbide bat eraikitzeko milioika euro daudelako, eta, hala ere, ez dutelako kontuan hartu nahi kalitatezko kalte ordainak eskaintzeko aukera egoiliar guztiei. Aitzitik, portuak nahiago izan du auzibidera jo”.
Azkenik, portuak azken egunetan egin dituen adierazpen batzuk “gezurtatu” ditu sindikatuak: “Portuak adierazi du Escalerillaseko bizilagunek uko egin diotela negoziatzeko biltzeari. Hau erabat faltsua da, izan ere, guztiz kontrakoa da. Ahozko epaiketa egin baino egun batzuk lehenago, bilera bat adostu genuen portuarekin; bilera hori bertan behera utzi zuen portuak berak aurreko egunean, agenda arazoak bidali zizkigutelako. Portuko lehendakari berriak ez du bizilagunekin bildu nahi izan, eta orain, difamatu egiten ditu, esanez horiek direla negoziatu nahi ez dutenak”.
Sindikatuak argi utzi du pertsona guztientzako kalitatezko bizitoki alternatiba bat aldarrikatzen jarraituko dutela, eta dituzten mekanismo guztiak erabiliko dituztela hori lortzeko.
