"Arrakastatsua" izan da Pasaia Itsas Festibalaren laugarrena
Eguraldiagatik "atzetik aurrerako" edizioa izan dela adierazi dute antolatzaileek. Aurtengoa agurtuta, 2028kora begira jarri dira jada.
Atzo bukatu zen Pasaia Itsas Festibalaren laugarren ekitaldia. Lau egunez Pasaiako badia nazioarteko itsas kulturaren topagune izan da, eta antolatzaileen arabera, laugarren edizioa “arrakastatsua” izan da: “Ontzi tradizionalek elkar topo egin dute Pasaian, eta bisitariek euskal itsas ondarea gertutik ezagutzeko beta paregabea izan dute”. Aurtengo festibalaren izarra San Juan baleontzia izan da, barrutik bisitatzeko aukera izan baitute bisitariek lehen aldiz. Sustatzaileek baietsi dute eguraldiagatik “atzetik aurrerako” edizioa izan dela, egunak aurrera egin ahala eguraldiak nabarmen hobetu baitu.
Atzokoa izan zen jaialdiaren azken eguna, eta bisitari askok eguna paseatzeko baliatu zutela jakinarazi du antolakuntzak. Besteak beste, Batelerek erakustaldia egin zuten Donibanen. Batelerek garai batean egiten zuten lana ikusarazi zuten atzoko ekitaldian.
Gazteenek goiz osoko planak izan zituzten festibalaz gozatzeko: planisferio bat marraztu zuten aterki batean, Patata Tropikala antzerki konpainiak Pirata garrapata ikuskizuna antzeztu zuen, eta erraldoiek kolorea eman zioten Pasaiari.
San Pedron jende mordoa bildu zela adierazi dute sustatzaileek. Eguerdian, Femmm Vocal Jazz taldeak musikaz bete zuen barruti morea. Ondoren, Kattalin eta Nenufarrak taldeak San Pedro girotu zuen. Festibala Trintxerpeko itsas danborradak itxi zuen.
2028ra begira
Pasaia Itsas Festibaleko ordezkariek eskerrak eman dizkiote Kanadako ordezkaritzari, haiei esker euskal baleazaleen istorioak Pasaiara itzuli baitira. Badian izan diren ontziei eta boluntario guztiei ere esker on hitzak helarazi dizkiete. Aurtengoa itxita, 2028ra begira jarri dira jada.
Hona hemen larunbateko eta igandeko irudiak. Argazkiak Pasaia Itsas festibalarenak dira.
