Barraketan, euskara eta inklusioa
Musikaren %80 gutxienez euskarazkoa izango da, hainbat tartetan ez da musikarik edo zarata ozenik egongo, eta gainera, hainbat egunetan prezio bereziak izango dira.
Mendekosteetan, Arraitokin jartzen diren barrakak euskaldunagoak eta inklusiboagoak izango dira, eta ingurumenari arreta handiagoa jarriko diote. Hala helarazi du udalak. Izan ere, horietan jarriko duten musikaren %80 gutxienez euskarazkoa izango da, hainbat tartetan ez da musikarik edo zarata ozenik egongo, festak iraun bitartean hondakinentzako ontziak jarriko dira, eta gainera, hainbat egunetan prezio bereziak izango dituzte. “Jaietako giroa ez dute ekitaldiek bakarrik sortzen; barrakek, kaleek eta herriko gune ezberdinek ere egiten dute. Horregatik, nahi dugu aisialdi eremu horiek ere errespetuan, euskaran eta bizikidetzan oinarritzea”, adierazi du Mikel Arruti alkateak. Neurri horiek udalak eta bertan izango diren ferialariek adostuta hartu dituzte.
Alkateak nabarmendu du udalak jai eredu inklusiboago eta herrikoiago baten alde egiteko adostu dituela neurri horiek barraken arduradunekin, “eta Mendekosteetako aisialdi guneetan ere herriko izaera eta balioak indartzeko balio dute. Pozgarria da urtez urte pauso berriak ematea, denek jaiak modu atseginean eta berdintasunean bizi ahal izateko”, nabarmendu du alkateak.
Adostutako neurriak, zehatz, ondoko zerrendan:
- Barraken prezio finkoa: bidai bakoitzak 2,5 euro balioko ditu atrakzio guztietan, eta 5 bidaiako bonuak 10.
- Umeen Eguna: Hilaren 25ean (astelehenean) Umeen Eguna izango da, eta egun horretan bidaia bakoitzak 1,5 euro balioko ditu.
- Ingurumena zaintzea: atrakzioak jartzen diren eremuaren ingurua ahalik eta garbien mantentzeko, Lezoko Udalak zabor ontziak jarriko ditu festak iraun bitartean.
- Musika euskaraz: eremuan musika jarrita egoten da denbora luzez, eta bertan entzungo diren abestien %80 euskaraz izango dira.
- Tarte inklusiboa: egunero, 16:30etik 17:30era, atrakzioen gunean ez da musikarik ez eta soinu ozenik egongo. Horrela, pertsona autistek edo entzumen hipersentikortasuna duten pertsonek ere barraketaz gozatzeko aukera izan dezakete.
