'Badiako ikastola txiki kementsu haiek' dokumentala urriaren 2an estreinatuko da
Donibaneko Juanba Berasategi aretoan izango da estreinaldia, 19:00etan. Pasaiako eta Lezoko udalen ekimenez egin da ikus-entzunezkoa.
Emanaldiaren aurkezpenerako kartelaren zati bat da honakoa. Pasaia-Lezo Lizeoaren sorreraren 50. urteurrenaren harira, Badiako ikastola txiki kementsu haiek dokumentala egin da Pasaiako eta Lezoko udalen ekimenez, Pasaia-Lezo Lizeoaren laguntzarekin, eta Ahotsak-en ekoizpenarekin. Horren estreinaldia urriaren 2rako iragarri dute: Donibaneko Juanba Berasategi aretoak jasoko du ikus-entzunezkoaren aurkezpen pasea, 19:00etan. Sarrera doan da, baina tokiaren erreserba egin behar dute han izan nahi dutenek (esteka haun baliatuta egin daiteke). Lanarekin bi udalek 1960ko eta 1970eko hamarkadetan Pasaian eta Lezon euskarazko hezkuntzaren alde egindako ibilbidearen memoria berreskuratu eta herritarren artean partekatu nahi dute.
Ikus-entzunezkoak Pasaian izandako ikastola txikien eta bertako andereñoen historia du jasota, baita Lezoko ikastolaren ibilbidea ere. Frankismoaren garaian, Pasaiako lau barrutietan ikastola txikiak sortu ziren, eta Lezon ere bide bera egin zuten. “Hasierako proiektu horiek elkarren artean harremanak sendotzen joan ziren, eta, ondoren, guztiak batzeko prozesua abiatu zen, Pasaia-Lezo Lizeoa sortzeraino. Dokumentalean jasotako testigantzek, besteak beste, gurasoen eta irakasleen auzolana, ikastolen antolaketa eta elkartzeko beharra, eta ikasle ohien bizipenak jasotzen dituzte”, azaldu dute bi udalek.
Dokumentalaren oinarrian elkarrizketak daude. 1960ko eta 1970eko hamarkadetan ikastola txiki horiekin harremana izan zutenen ahotsak daude jasota, Euskal Herriko Ahotsak proiektuko kideek egindako lanari esker. Hala, ahozko ondare horri balioa eman diote udalek, 30 lagun izan baitira elkarrizketatuak. Gainera, garaiko argazki eta bideoak ere ageri dira lanean.
“Testigantza horiek erakusten dute”, esan dute udalek, “ikastolen sorrera ez zela soilik hezkuntza proiektu bat izan, euskaraz ikasteko eta hezteko herriaren nahia gauzatzeko ahalegin kolektiboa baizik. Gurasoek, andereñoek eta herritarrek auzolanean egin zuten aurrera, eta pixkanaka ikastola txikiak elkartzeko prozesua abiatu zen. 1970eko hamarkadaren amaieran eman zen hurrengo urratsa, eta Pasaia-Lezo Lizeoa 1976an eraikitzen hasi eta 1979an inauguratu zen ofizialki”
Emanaldiarekin batera ekitaldi laburra izango da, eta hara joango direnei mokadutxoa emango diete.
