"Antolatzea eta borrokatzea dira tresnarik onenak. Langile klase indartsua behar dugu"
Errenteria-Orereta eta Oiartzunen izan dira greba orokorreko eskualdeko mobilizazioak, handiak. Jarraipen zabala izan du gaurko egunak.
Milaka herritarrek bat egin dute arratsaldeko mobilizazioarekin. Etxebizitza eskubide unibertsala dela aldarrikatzeko eguna izaten ari da gaurkoa. Etxebizitza sindikatuek eta gehiengo sindikalak deitutako greba orokorrak jarraipen zabala izan du gurean ere. Goizean Donostian egindako mobilizazio erraldoiaren ondoren, arratsaldean ere kalera atera dira Oarsoaldeko herritarrak. Errenteria-Oreretako kaleak manifestazio oso handi batek hartu ditu arratsaldean, Etxebizitza eskubidea bermatzeko, espekulazioari ez! lemapean. Zientoka eta zientoka lagunek bat egin dute arratsaldeko mobilizazioarekin.
Mobilizazioaren bukaeran lepo betetako Zumardia batek jaso ditu hitza hartu duten grebalariak. Gaurko aldarrikapen nagusia, etxebizitzarena, “langile klasearen pobretzearen arrazoi nagusietako” bat dela salatu dute, gogor. “Euskal Herrian argi ikusten dugu hori: prezioek gora egiten dute, bizitegi erabilerarako etxebizitzen kopurua murrizaten ari den bitartean, etxegabetzeak ugaritzen ari dira eta, aldi berean, etxerik gabeko pertsonei zuzendutako baliabideak murrizten”.
Balantzaren alde batean “pobrezia, eskubide ekonomiko eta politikoen murrizketak eta ziurgabetasuna” pilatzen dela esan dute, eta etxebizitzaren inguruko negozio espekulatiboaren hazkundeak “arrakala sozioekonomikoa zabaldu” duela. “Langileriaren zati batek familia ondaretik geratzen zaienari esker egin diezaioke aurre krisiari, baina beste asko dira aukera hori ez dutenak. Arrakala horretatik sartu nahi dute faxismoak eta diskurtso erreakzionarioek, azkenaurrekoa azkenaren aurka jarriz. Baina guk ez dugu hori onartuko”. Zentzu horretan, etxebizitzaren alde gogorrena pairatzen dutenak gogoratu dituzte gaur, tartean, indarkeria matxista jasaten duten emakumeak, sexu genero disidentziak, gurasoen babesik ez duten gazteak eta migratzaileak.
Arazoaren errora jo dute. Espekulatzaileak, errentistak, inmobiliaria enpresak eta hauek babesten dituzten politikariak seinalatu dituzte errunduntzat. Horregatik, klase borroka indartzeko eta kapitalaren eta patronalaren interesei aurre egiteko unea dela esan dute.
Erakunde publikoak, “erantzule”
Espekulatzaileen interesen zerbitzura dauden erakunde publikoak ere seinalatu dituzte gaur. Batetik, eskuineko PP, UPN eta EAJ aipatu dituzte, “espekulazioa bultzatzen duten politikak ezkutatu gabe sustatzen dituztenak eta kapitalaren agenda erreakzionarioaren mesederako politikak aplikatzen dituztenak”. Bestetik, PSOEren gobernuaz aritu dira, “egoera errotik aldatzeko ezer egin ez duena, errentadunen eta enpresaburuen interesak ordezkatzen dituen heinean”. Gobernu honi babesa eman dioten alderdi guztiak ere “erantzule” direla nabarmendu dute gaurkoan, eta “agerikoa” dela “handikeriaz aurkeztutako Etxebizitza Legeak ez dituela agindutako aldaketak ekarri”. Honakoa erantsi dute zentzu horretan: “Eraginkortasun urriko konponbide partzial batzuetatik harago, hartzen ari diren neurriek errentismoaren interesak eta finantzaketa blindatzea dute helburu”.
Euskal Herri mailan erantzukizuna duten erakunde guztiak ere seinalatu dituzte gaurko irakurketan: Eusko Jaurlaritza eta Nafarroako Gobernuak eta foru aldundiak, “eskumen zabalak izan arren, higiezinen negozioa indartzen duten politikak babesten” dituztelako. Besteak beste, espekulatzaileen eskuetan bukatzen duten diru laguntza eta abalak sustatu dituztela salatu dute: “eraikuntza ziklo berri bati bide ematen dioten legeak onartu dituzte, eta erretistentzako onura fiskaletan oinarritutako politikak aplikatzen ari dira”. Bukatzeko, deitoratu dute alderdi guztietako udalek gauzatzen dituztela etxegabetzeak, “alternatibarik eskaini gabe”.
Espekulazioarekin eta errentismoarekin bukatzeko hiru norabide nagusitan aurrera egitea eskatu dute. Lehenik, espekulatzaileei ondasunak espropiatzea eskatu dute; bigarrenik, etxebizitzaren erabilera espekulatiboa eta errentista debekatzea; eta hirugarrenik, etxebizitza eta baliabide guztiak langile klasearen beharren arabera antolatzea.
Bidegabekeria guzti hauei aurrei egiteko antolatzeko eta borrokatzeko beharra nabarmendu dute azkenik. “Euskal Herrian badaude aurrerapausoak emateko baldintzak. Azken urteotan frogatu dugu borroka beharrezkoa dela eta merezi duela. Arazo indibidualak balira bezala aurkezten dizkiguten arren, ezinbestekoa da kolektiboki antolatzea. Ez sentitu lotsarik edo errurik; antolatzea eta borrokatzea dira tresnarik onenak. Langile klase antolatu eta indartsua behar dugu. Bai eskuineko balizko gobernu batek ekar dezakeen eskubideen atzerakadari aurre egiteko, bai ezkerreko gobernuak eman nahi izan ez dituen aurrerapausoak lortzeko”.
Jarraian, arratsaldeko zenbait irudi:
